Pathianni zan dar 10-ah League Cup final Aston Villa Vs Man City
Carabao Cup final chu Pathianni zan dar 10:00 hian Wembley Stadium-ah khelh a ni dawn a, champion lai Manchester City leh Aston Villa te an inkhel dawn. Pep Guardiola hote hian hnehna an chang a nih chuan kum thum chhung a zawnin League Cup nomawi an chawi dawn tihna a ni a, vawi ruk champion tawh club hian 2014 aṭanga chhiarin vawi li an champion tawh avangin Villa lakah rinkai zawk
a ni ang.
Aston Villa erawh tun hmaa English club ropui ṭhin a ni a, League Cup an champion hnuhnunna ber pawh kum 1996 daih tawh kha a ni. Tunah erawh Villa hi Man City nen inbuk tawka ngaih an ni lo a, Premier League kai thar hian January thla khan an mualah Pep-a hote hi 6-1 zetin an hneh loh bakah October thla khan Etihad Stadium-ah 3-0 in an hneh lo.
Final kalkawng
Manchester City hian semifinal-a Manchester United an hmachhawn ṭumin harsatna nei loin final an thleng. Pep-a hote hian Preston North End 3-0 in an hneh a, Southampton 3-1 a hneh lehin quarterfinal-ah Oxford 3-1 bawkin an hneh.
Semifinal first leg-ah City hian Old Trafford 3-1 in an luhchhuah a, an mualah 1-0 in chak lo mah se inkhel an thunun avangin awlsam takin final an thlengah a sawi theih.
Aston Villa erawh Europe inelnaa an tel loh avangin bul an ṭan hma hret a, Crewe Alexandra 6-1 in an sawp. Third round-ah Brighton & Hove Albion 3-1 in an hneh a, quarterfinal lut turin Wolverhampton Wanderers 2-1 in an hneh hram.
Villa an vannei zui a, Liverpool nen pawh fuh ni mah se Jurgen Klopp-a hoten FIFA Club World Cup an khelh avangin Reds academy player hmachhawnin 5-0 in an sawp.
Semifinal-ah Villa hian Leicester City an hmachhawn a, King Power Stadium-ah 1-1 in an inhnehtawk. Villa Park-ah pawh team pahnih hi minute 90-na thlengin 1-1 in a la inhnehtawk a, injury time-ah Trezequet-a'n chakna goal a khung.
City vul lai
Manchester City-in Premier League nomawi humhim beisei tawh lo mah se Champions League-a Real Madrid hneh zo hlim an nih avangin an phur vanglai tak a ni a, Pep Guardiola hote tan nomawi lak theih hmasa ber chawi hi team boruak siam ṭhat nan a pawimawh bawk.
UEFA-in Man City hi Financial Fair Play dan an bawhchhiat avanga Europe inelnaa season hnih chhung inlan thei lo tura a hrem hnuah team an inlungrual lehzual a, khelmualah team brouak a
ṭha zawk. Hun harsa hian City chakna a pe a, ṭum dang zawng aiin League Cup nomawi chawi an duh lehzual ang.
Villa buai lai
Aston Villa erawh Foxes hneha final an luh hnuah match thum khel leh tawhin Bournemouth, Tottenham leh Southampton te hmachhawnin an hneh lo vek.
Villa tana beisei siamtu erawh Man City angin Europe-ah inelna an hmachhawn lo a, Pep-a hoten Santiago Bernabeu-ah inelna hautak zet an hmachhawn laiin anni erawh League Cup final atan an inpuahchah thung. Final a nih tawh avangin result danglam a thleng thei a, team nem Villa tan minute 90 chhunga goal venhim a pawimawh dawn.
Goal venhim kawngah Liverpool keeper hlui Pepe Reina a pawimawh dawn a, Spanish keeper ball pet thiam hi counter attack-ah a ṭangkai thei bawk ang. Villa a nih tawh chuan captain Jack Grealish hi mipui mit fukna tur a ni a, English midfielder hian nomawi a chawi a nih ngat chuan nipui bazarah a man a to khawp ang.
Intawnna hnuhnung panga
12 Jan 2020 Aston Villa 1-6 Man City Premier League
26 Oct 2019 Man City 3-0 Aston Villa Premier League
05 Mar 2016 Man City 4-0 Aston Villa Premier League
30 Jan 2016 Aston Villa 0-4 Man City FA Cup
08 Nov 2015 Aston Villa 0-0 Man City Premier League