DC tan IPL final a hnai

Delhi Capitals chuan Nilaini zan khan IPL eliminator-ah wicket hnihin Sunrisers Hyderabad an hneh a, pen khatin final an hnaih leh ta sawt - zanin dar 7:30-ah Chennai Super Kings nen qualifier 2 an khel dawn a, hnehna an chan chuan final an lut ang. 

Pathianni zan dar 7:30-ah IPL final hi khelh zui tur a ni a, Chennai leh DC inkhela chak zawk hian Mumbai Indians nen champion nih an inchuh dawn a ni. Visakhapatnam khawpuia eliminator inkhelah Hyderabad club an bat hmasa zawk a, opener Martin Guptill chuan vawi li ngawt six rawn vaw chhuak nghal mah se an ropui zui lo - batsman zingah run 40 vaw kai thei awm loin over 20-ah wicket riat an hloh a, run 162 chiah an tlin. 

Delhi che ropui chhunzawm bik lua lo mah se opener Prithvi Shaw-a'n run 56 a siam nghal chu an vanneihpui a, Rishabh Pant pawhin run 49 a thawh - ball khat chiah an nei tawh tihin an target an umpha a, wicket riat hloh chungin an chak.