David Ferrer hun a liam ta

Nilaini zan Madrid Open second round inkhelah David Ferrer chu Alexander Zverev hneh loin a tla a, Spanish player hian a sawi lawk tawh ang ngeiin tennis a chawlhsan zui nghal bawk.

Kum 37 mi Ferrer hi German tlangval lakah hian 6-4, 6-1 in a chak lo. A vanglaia world number 3 pawh ni tawh Ferrer-a'n Madrid Open hi a tan inelna hnuhnung ber a nih tur thu a lo sawi lawk tawh a, nomawi nen chawlh duh mah se a duhthusam erawh a thleng dawn ta lo.

Ferrer chuan, "Ka hun tawpah hetianga min thlah hi ka beisei phak lo, kan ramah ngei ka hun tawp ka hmang thei hi ka lawm. Chawl mah ila tennis hi chu a ngaiin a la awm chhunzawm zel dawn a, ka hun tawn tawhte hi ngai chungin ka la chhut let ṭhin ngei ang," a ti. Inkhelh zawhah Ferrer hi a team ten thlahna hun an hman sak a ni.

Inkhel dangah Rafael Nadal chuan Felix Auger Aliassime 6-3, 6-3 a hnehin third round a lut. Grand Slam vawi 17 champion tawh Nadal hi damlohna vangin buai deuh mah se court chhungah erawh a dam tawh tih a lantir.

World number 2 Nadal chuan, "Pum na vangin harsatna ka tawk, amaherawhchu beisei aia ṭhaa ka khel chhuak thei hi a lawmawm lai chu a ni," a ti. Nadal hian Thawhlehni khan thuthar lakhawmtute a kawm a, hun an hman laklawh laiin a pum na vangin a kalsan a ni.

Hliam dam hlim Juan Martin del Potro-a'n beisei ang result a nei thei lo. Argentine tlangval hi Laslo Djere lakah 6-3, 2-6, 7-5 in a chak lo a, seeded chang phak lo mah se Stan Wawrinka erawh ṭha taka khel chhuakin Guido Pella 6-3, 6-4 in a hneh.