Nations League-ah Ronaldo a inlan dawn - Portugal manager

Portugal manager Fernando Santos chuan an ramin Nations League finals an thlen hunah Cristiano Ronaldo a khelh tur thu a sawi.

Kum 34 mi Ronaldo hian World Cup zawhah interna­tional match rukah a inlan lo a, chung zingah Nations League qualifying pawh a tel. Portugal captain hi March thlaa Euro 2020 qualifier an khelh ṭumah erawh a inlan thung.

Kum 64 mi Santos chuan, "Ronaldo khan qualifying stage-a inlan lo turin chhan ṭha tak a nei a, kan hriatthiam pui. Amah pawhin chiang takin a khelh theih loh chhan a sawifiah a, a harsatna hi kan pawm thlap," tiin World Cup zawha an thiampuipa inlan tlem chu an hriatthiampui tih a sawi.

Portugal coach chuan sawi chhunzawmin, "Ram tan Ronal­do hi a inpe em em a, inelna hma­chhawn tur pawhin kan thlang dawn," tiin Nations League khel tura an thlan ngei tur a sawi. Ronaldo hian ram tan goal 85 a khung tawh a, Portugal history-a goal khung tam ber a ni. Juventus forward hian an ram Portugal hi European Championship nomawi a chawi pui tawh a, Nations League hmasa bera a champion leh chuan a ropuina belhchhahin a awm ang.

Nations League hi inelna thar a ni a, nikum Septem­ber thla aṭanga ṭan niin friendly match tam zawk thlaktu a ni a, international match an ngaihven theih nan an buatsaih a ni.

Europe ram 55 te chu an ranking aṭangin league paliah sem darh a ni a, relegation leh promotion a awm thlap. Finals bik erawh League A-a awmte tana buatsaih a ni a; Netherlands, Switzerland, Portugal leh England te hi an awmna group ṭheuha pakhatna an ni.

Finals hmasa ber hi Por­tugal-in a thleng dawn a, stadium pahnih Estadio do Dragao leh Estadio D Afonso Henriques-ah khelh a ni dawn. June 5-ah Portu­gal leh Switzerland te an inhma­chhawn ang a, June 6-ah Netherlands leh England te an inkhel ang. Final leh pathumna zawnna hi June 9, Pathianniah neih zui nghal a ni ang.

Semifinal leh final hi single-leg knockout match-a khelh tur a ni a, minute 90 hnua an inhnehtawk a nih chuan extra time minute 30 khelh leh tur a ni. Extra time an thleng a nih hun pangngaia substitute pathum bakah substitute dang pakhat a siam belh theih ang.

Extra time-ah pawh an in­hneh­tawk zel a nih chuan penalty shootout hmanga chak zawk zawn tur a ni a. Inelnaah hian goalline technology system leh video assistant referee (VAR) system te hman a ni dawn.