Auba leh Arsenal an tla

Pierre-Emerick Aubameyang goal hmangin Arsenal an hlim a, hun tawp dawna hun ṭha a hlah erawh an ui khawp ang. Mikel Arteta enkawl Gunners chu Olympiakos hneh loin Europa League aṭanga pet chhuah an ni.

Greek club khelmualah Arsenal 1-0 in an chak a, rinkai ni chungin Emirates Stadium-ah mikhual an thleng. Mahse, inkhel a zawh meuh chuan 2-1 in an chak lo, inkhel pahnih belhkhawmah 2-2 ni chiah mah se mikhualna muala goal khung tam zawk Olympiakos an tlang.

Ningani zan inkhelah mikhual Olympiakos lam an chefuh hmasa zawk, second half minute 53-naah Pape Abou Cisse hmanga goal khungin 1-0 a ni, match hmasa lama an siphurh an sut zo chiah.

Hun pangngaiah goal a luh belh lo, extra time khelh zui a ni. Striker Aubameyang-a'n box chhungah mawi taka invawrh chungin an hmahruaina goal a bin lut a, tlarhnung lam venghim ṭha se tlang mai tur an ni.

Mahse, hun tawp dawnah Gunners tlarhnung inthlahdah karah Youssef El Arabi chuan chakna goal a rawn khung; goal hnuhnung luh hi minute 199 a ni tawh; North London club tan insiamṭha leh tur chuan a tlai zo tawh.

Premier League lamah beisei an phak loh avangin Arsenal tana Champions League ticket neih theihna kawng dang chu Europa League champion nih a ni. Mahse, tunah chuan an ticket neih theihna kawng hnai zawka ngaih chu a tawp.

Manager Arteta-a'n goal neih tumin Aubameyang, Alexandre Lacazette, Mesut Ozil leh Nicolas Pepe te a luhtir vek a, an man zat pawh pound maktaduai 215 zet a ni. Amaherawhchu, player langsar pali tel chung pawhin Gunners hian extra time-a goal luh hma zawngin target-ah vawi khat chiah an pet!

Kumin bika a vawi khat nan Arsenal an chak lo, manager Arteta chuan, "A na takzet, match pahnihah set-piece aṭangin goal li kan chhuah a, thil a harsa zo ta vek a ni," a ti. An buaina belhchhah turin defender Shkodran Mustafi chu malpui hliam vangin an chan bawk.

Arsenal captain Pierre-Emerick Aubameyang-a'n hun tawp hamrik rik hma chiahin hun ṭha a nei a, hnai takah Olympiakos keeper Jose Sa chauh hmachhawn tawh mah se goal zawnah a pet lo, kawh zetin goal ban hrulah a pet chhuak.

Auba chuan, "Engtin nge khatiang hun ṭha kha ka hlah theih ka hre bik lo, ka chau in ka ke a kham tawh, chu erawh chhuanlam tur a ni lo," tiin a sawi. Gabon international hi khelmualah a ṭhingṭhi a, hmai hupin a hnuk a ulh.

Premier League striker hriam berte zinga mi hi winger atan hman a ni ṭhin, tlarhnung lam pui turin a tlan let hnem hle bawk. Kum 30 mi a ni tawh a, tun hnaiah match an ngah bakah manager-in a khelh tir dan hi atan chuan chauhna tham a tling.

Gabon international hian February 2018 khan North London club tana a match hmasa ber a khel, goal 61 khung tawlin EPL player zingah chuan a hun chhung inangah Liverpool forward Mohamed Salah (64 goals) chiah ani aia khung hnem a awm.

Season hmasa khan Auba hi EPL goal khung hnem ber ni mah se UCL an khel phak lo, kuminah pawh goal khung hnem ber a ni leh mek. Barcelona lamin an lo ngaihven ve reng avangin, tun ang renga Gunners an kal a nih chuan an captain hi chelh a harsa ang.