India U19 awmna a awlsam dawn lo
AFC Under 19 Championship Qualifier 2020-a India awmna tur group chu nimin khan tihchian a ni a, Blue Tigers rawlthar rual hi Saudi Arabia, Uzbekistan leh Afghanistan te nen Group F-ah an awm ho dawn.
Qualifier hi November 2 aṭanga khelh ṭan tur a ni a, November 10 thleng a awh ang. India coach Floyd Pinto chuan, "Kan tan chuan fixture hautak zet a ni a, mahse ka naute hian Hero I League-ah pawh khan team ṭha ber pawh an tum thei tih an pholang tawh a ni," a ti.
India hi 2017 khan Saudi Arabia nen hian qualifier-ah an lo awm ho tawh. Hemi kum hian Turkmenistan chu 3-0 in an hneh a, Yemen chu 0-0 in an inhnehtawkpui bawk. Mahse, Saudi ber hi 5-0 ngawta an ngam loh avangin an tling zo chuang lo.
Hetihlai hian AFC Under 16 Championship Qualifier 2020 atana India awmna group tur pawh a chiang a, September 18-22 chhunga neih tur qualifier-ah hian India hi Uzbekistan, Bahrain leh Turkmenistan te nen group khatah an awm ho a ni