Chhinga Veng dinhmun a chiang

Suzuki Gixxer Pro Volleyball League 2019-ah Chhinga Veng Spikers chuan semifinal an khel dawn tih a chiang ta a, palina dinhmun luahtu Chanmari West tan erawh knockout round lut tur chuan midang result an ngaihchan a ngai tawh dawn a ni.

Nilaini zan Chawnpui Sports Centre-a inkhelah Chhinga Veng hian 15-9, 13-15, 16-14, 13-15, 15-10 (3-1) in Chanmari West hi an hneh a, league match nga an khelh tawh chinah hnehna an chang vek - match khat chiah khelh hmabak an nei tawh.

Spikers vice captain Mandeep Singh a khel hmuhnawmin a ṭangkai leh hle a, point 33 ngawt thawk chhuakin a vawi nga nan RS Traders Player of the Night atan tlan a ni a, tun PVL bikah ani aia hetiang dinhmun luah hnem hi an la awm lo.

Chanmari West tan Abhimanyu Ray-a'n point 20 thawk chhuak mah se Spikers hneh nan a tawk zo lo a, West Warriors hian league match ruk an khelh tur an khel zo tawh - point 13 neiin an hnuaiah Anastasia Electric Veng (12points) leh Tuichangral (11) te an la awm; anni pahnih hian match khat ve ve khelh hmabak an la neih avangin an dinhmun hi a la danglam thei a ni.