Netherlands luahtu mittui, lawmna leh Spurs!

Johan Cryuff Arena-ah hun tawp hamrik a ri a, mittui parawl kuang chungin Tottenham Hotspur manager Mauricio Pochettino a ṭhingṭhi hnawk a, khelmual a fawp ngawih ngawih a, mittui nena chu patling hlim hmel chu khawvel hian hmuhnawm ti takin a thlir a!

Nilaini zan khan Tottenham chuan tih theih loh tluka ngaih an ti. Champions League semifinal second leg-ah 2-0 zetin an hnufual tawh a, first leg nen 3-0 a nih hnuah Ajax chu 3-2 in an lehthal a, agg-ah 3-3 ni chiahin away goal rule hmangin an chak. Spurs hian a vawi khat nan Champions League final an lut. 

Spurs tan Lucas Moura chuan London club chanchina thaireh ni leh tawh ngai lo turin a hming a ziak kai a, hattrick a siam - a goal thumna hi hun pek belh minute ruknaa a khung a ni. Moura hian inkhelh zawhah social media lamah Bible chang a tarlang a, chu chu Luka 1:37 thua, "Pathian thuchhuak reng reng thiltithei lovin a awm lo vang," tih kha a ni - tih theih loa ngaih an ti miau a!

First leg-a team pahnih inkhelah Ajax hian 1-0 in hnehna an lo chang tawh a, khualmuala goal nei sa zawk an nih avangin an dinhmun a ṭha takzet - Dutch Cup-ah an champion tawh a, league-ah an dinhmun a ṭhat bawk avangin treble champion an sawi ri der tawh. 

Spurs dinhmun tichhe zualin turin Ajax-in minute ngana lekah captain Matthijs de Ligt hmangin goal hmahruai an khung zui. London club an inring hman lo a, an phurrit tawh sa a rih belh. Minute 35-na a ni a, Ajax bawkin goal an khung leh ta - Hakim Ziyech chuan an goal hnihna a rawn khung a, Spurs-in tlang tura an mamawh zat chu goal thum a ni.

First half-ah goal dang a lut tawh lo a, Spurs-in comeback turin minute 45 bak an nei tawh lo. Ajax fan-ten Tottenham mangṭhana hla an sa ṭan tawh a, Mizo zingah 'chak tur a chiang' tia inkhel en zo loa mutsan an tam a nih pawhin a mak lo - Harry Kane tel lohna Spurs hi goal thum khung tura beisei an harsa. 

Ajax ṭantuten hriat loh an nei - Spurs-in Lucas Moura an nei a, player-ten a tawp thlenga bei turin rilru huaisen an nei tel bawk. Si thum an phur a, minute 45 chauh an nei tawh chungin Spurs an beidawng lo. 

Minute 55-na aṭangin Moura a inlar ṭan a, Spurs goal hmasa ber a rawn khung. Minute li chauh a liam hman a, Moura bawk a inlar. Paris Saint-Germain duh loh hnu hian an si phurh a rawn sut zo. Premier League club-in mahni muala goal chhuah man an tuar a, khualmuala si hnih phurh an sut zawh hnuah pawh tlang turin goal khat khung an la mamawh cheu. Hun pek belh a ni tawh a, hun pek belhah pawh minute ngana a ral mek tawh - Moura chuan kil zetah goal a rawn khung. 

Johan Cruyff Arena-a reh duk a, Ajax player-te khelmualah an tlu hnawp a, khelmual pawn lamah Pochettino leh a naute an sapatal - hun a tawp zui a, Spurs-in Liverpool hnung zuiin Champions League final an lut. Kum 2008-a Manchester United-in Chelsea an hneh hnua UCL final-a English club pahnih an intawn leh hmasak ber tur a ni. 

Minute 5: Kum 19 mi Ajax captain Matthijs de Ligt chuan corner aṭanga ball kal chu a tauh lut a, amah vengtu Kieran Trippier-a'n a hna tur a thawk ṭha tawk lo a tih theih. 

Minute 35: Hakim Ziyech-a'n Ajax goal hnihna a khung a, he goal hi Southampton winger Dusan Tadic-a siamsak aṭanga a khung a ni. Spurs-in tlang turin goal thum khung an mamawh tawh. Ajax goal class tak chuan Dutch club dinhmun ṭha tawh sa chu a tih ṭhat belh. 

Minute 55: Lucas Moura hun a inher chhuak. Brazilian forward hian  Dele Alli hnen aṭanga ball la chhawngin ṭha takin a tlan luhpui a, Ajax keeper Andre Onana dan hman lohin a pet lut. 

Minute 59: Spurs goal khung aṭangin minute li chauh a la liam hman. Bench aṭanga luhtir Fernando Llorente goal khung ngei tur nia lang chu Ajax keeper-in ṭha zetin a dang a, a per lehlam man a tumna lamah midfielder Lasse Schone chuan ball a lo la chhuak hman. Lucas Moura chuan hei hi nangfuhin ṭha zeta a insiam rem hnuah si phurh sutna goal ni turin a khung. 

Minute 90+6: Hun pek belh zat chu minute nga a ni a, minute rukna a kal mek tawh. Spurs-in thil mak an thlentir a, Moura chuan ṭha zetin a hattrick siamna goal a khung a, Ajax tan tho leh turin hunin a daih tawh lo.