Zero to Hero - Spurs & Moura!

Tottenham-in tun season Champions League bul an ṭan dan kha an thlirlet chuan tun dinhmun hi an thlen phak an inring bik kher lo ang - Barcelona, Inter Milan leh  PSV Eindhoven te nen group khatah an awm ho a, a harsa dawn tih kha a tir aṭangin a chiang nghal. 

Match hmasa pahnihah an tlawm nghal a, a vawi thumnaah draw result an hlawh chhuak hram! Mahse, a zawna PSV leh Inter an hneh ve leh hnuah beiseina an nei thar a, last 16 lut turin an match tawp berah Barcelona inhnehtawkpui an mamawh. 

Nou Camp-ah hun rei zawk si khata an hnufual hnuin minute 85-naah Lucas Moura chuan si phurh sutna goal a khung a, last 16 an luh phah - last 16 an luh chhan kha final an luh chhan player a ni leh ta. Round of 16 chin aṭangin Spurs tak tak kan hmu. A hun laia Bundesliga lama fal taka hmahruaitu Borussia Dortmund chu 4-0 in last 16-ah an sawp a, quarterfinal-ah team ṭha zawka ngaih Manchester City an hneh zui a, Real Madrid leh Juventus ngamtu Ajax an mangṭha leh ta. 

Kum 26 mi Moura hi January 2018 khan Neymar an neih tawh avangin Paris Saint-Germain chuan Spurs hnenah an hralh a, PSG-in pound maktaduai 200 man Neymar hoin Champions League round of 16 aia sang an la thleng lo a, Moura hoin Spurs-in final an lut ta thung.

Tottenham midfielder  Christian Eriksen chuan, "Zanin inkhel chu tactic lam a ni lo. Huaisen taka thinlunga beihna leh Lucas Moura chungchang a ni. Moura vangin kan chak a, England-ah a lim an din ka beisei," a ti! Spurs boss Mauricio Pochettino chuan, "Ka player-te kha hero vek an ni a, Moura erawh superhero a ni," a ti - Moura chuan, "Ka career-a ka hun tawn ropui ber a ni," a ti a, "Sawifiah theih a ni lo. Pathian hnen aṭanga thil thlawn pek, ka khelhpui, ṭhian leh chhungkuate nena chen ka duh chu hei hi a ni," tia sawi zuiin a hlim hle. 

Tottenham full back Danny Rose chuan, "Liverpool inkhel kha kan en a, kha khan min fuih phur a ni. Hotel-ah pawh coach-in kha inkhel chungchang kha a sawi a, huai taka bei turin min hrilh a ni," a ti.