Srinagar-ah Chhinga Veng leh Lonestar inhnehtawk

2nd Division League-ah Chhinga Veng chu nimin tlai khan Lonestar Kashmir nen 1-1 in an inhnehtawk. Mizo club tan hian MS Dawngliana chuan injury time minute nganaah siphurh a sut. 

TRC Turf Ground, Srinagar-ah Chhingcows hian point hlu tak an hlawh­chhuah avangin pahnihna ni mah se, hmahruaitu Trau FC-in an khingpui an hneh vek avangin Mizo club tan I League khelh a harsa tawh ang.

Chhinga Veng khingpui Lonestar Kashmir FC-in an match hmasa pahnihah point hlawh chhuak lo mah se khualmual ve vea an khelh avangin Mizo club tan fimkhur a ṭul a. An inkhelhna hmun TRC Turf Ground, Srinagar-ah hian Aizawl FC pawhin I League-ah Real Kashmir an hneh lo a, vanduai theihna hmun a ni tih a chiang.

Chhingcows-in chak ngei tumin bul an ṭan a, amaherawhchu first half-ah goal a lut lo. Second half ṭan chiahah Lalrammawia'n an lamah a tihluh avangin Mizo club hmabak a harsa sawt. Chhinga Veng hian siphurh sut tumin an nawr chhunzawm a, hun tawp thlengin an beidawng duh lo. A tawpah rah ṭha a thlen, MPL club hian injury time-ah penalty an hlawh chhuak a, MS Dawngliana'n siphurh sut nan a hmang. Goal dang luh belhna hun a awm tawh lo a, 1-1 in inkhel a tawp.

Trau FC an che ṭha tluang zel a, final round-ah vawi khat ṭheuh khel kual tawhin an khingpui an hneh vek. Manipur club hian Nilaini tlai khan khualmualah Ozone FC chu Yami Longvah goal hnih hmangin 2-0 in an hneh a, match thumah point kua an hlawh chhuak.

Laishram Ibomcha Singh hote hian May 12-ah an muala an hneh tawh Lonestar Kashmir hi Srinagar-ah an hmachhawn dawn a, hnehna an chang a nih chuan match hnih khelh hmabakah champion turin point thum chiah an mamawh tawh ang. Chhinga Veng erawhin May 15, Nilaini hian Ozone FC an mikhual dawn a, I League beiseina tinung turin chak ngei an mamawh.