Liverpool an chak ve ta

Premier League match hnih a zawna an tlawm tawh hnuah Liverpool an chak ve ta a, Wolverhampton Wanderers khelmualah 1-0 in an chak. 

Reds tan Wolves aṭanga Anfield pantu Diogo Jota chuan inkhela goal awmchhun a khung a, Molineux-ah mualneitu lamin a chhanletna tur an neih loh avangin an tlawm. 

Liverpool-in hnehna an chan avangin season thara Champions League khelh an beiseina chu a nung thar leh ta a, league table-ah paruknaah an chho. 

Jurgen Klopp-a naute hian palinaa awm Chelsea chu point ngain an phak lo mek a, pangana West Ham chu point hnihin an phak lo bawk - an league match khelh leh tur chu international break vangin April 4-ah an khel dawn chauh a, Arsenal an lenchilh ang. 

Liverpool hi Champions League quarterfinal lut hlim an ni a, last 16 second leg-a RB Leipzig an hneh (2-0) ṭumin Klopp-a'n tlarhnungah defender tawnhriat nei tlem a ring lui a, midfield-ah Fabinho leh Thiago Alcantara a inkawptir. 

German coach-in thutlukna a siam sual lo tih kan hmu tawh a, Wolves lakah pawh centre back-a a chhawr ṭhin Fabinho chungah rinna nghat luiin midfield-ah Thiago leh Georginio Wijnaldum nen a inkawp nawntir. 

Tlarhnung laiah tawnhriat nei tlem Ozan Kabak leh Nathaniel Phillips bawk an inkawp a, Andy Robertson leh Trent Alexander-Arnold an ding bawk. 

Liverpool tan Roberto Firmino chu a inhliam avangin squad-ah a la awm thei lo a, Brazilian forward awm loh hlanin Jota, Mane leh Salah-te inkawptir an ni. 

Liverpool-in an ṭhat dan berin squad rem thei lo mah se centre back-a Jordan Henderson leh Fabinho inkawp hun lai ang ngawt ni loin mahni position ṭheuhah player an khel thei a, player-te an inringtawk. 

First half hun pek belhah Jota chuan goal a khung ta nge nge a, Portuguese forward goal khung theih nan hian mahni hmasial vanga inthlawp ṭha tawk lo nia sawi Salah leh Mane an thawhhlawk dun hle. 

Mane hnen aṭanga a ball hmuh chu Salah-a'n hmasial lo takin Mane-a siamsak a, Senegalese forward hian Jota a pe ve leh - Wolves forward hlui hian a club hlui laka goal khung nan a hmang. 

Liverpool hi an ṭhat vanglai ang takin tlarhmaah erawh an la hriam tawk lo niin a lang a, Jota, Salah, Kabak leh Mane-ten an chance neih ṭha dang kha khung ni se awlsam zawka chak thei an ni - Salah hi offside vangin a goal khung pawm a ni lo bawk. 

Wolves goalkeeper Rui Patricio chu hun tawp hnaih tawh lamah a lua hliam avangin lakchhuah a ngai a, Portuguese keeper hi Salah goal khung tur dan an tumna lamah captain Conor Coady nen an intawk fuh. 

Liverpool academy chhuak Coady hian a khupin Patricio-a luah a tauh fuh a, November-a Arsenal nen an inhmachhawn ṭuma a lu ruha hliam lo tuar tawh Raul Jimenez chuan hlauthawng takin mual sir aṭangin a lo en - Wolves forward pawh hi a hliam vang hian tun thlengin a la inlan thei lo. 

Patricio inhliam avang hian minute 15 ngawt chu inkhel tih khawtlai a ngai a, a thlak turin John Ruddy a lo lut. Patricio leh Coady an insut hian Salah chu a offside a, mahse VAR dan angin assistant referee-in a phar lawk lo - Salah an goal-a khung zui a, offside vangin pawm a ni lo thung. 

Mahse, Portuguese keeper hi inkhelh zawhah hlauhthawn ang ema a nat loh thu Wolves boss Nuno Espirito Santo chuan sawiin, "Rui Patricio dinhmun a ṭha a, engkim a hre vek a ni. Thil thlen dan pawh a hre vek a, an ennaah pawh engkim a ṭha a, a ṭha chhuak thuai ang," a ti a, Patricio a ngaihtuahawm loh. 

A pawimawh ber chu result a ni a, theihtawp kan chhuah a ni. Point thum kan hmu a nih phawt chuan ka lawm vek mai e. Chutihrual chuan a aia ṭha zawka kan tih theih tura beisei ka nei nual a, tlarhnung thlirna aṭang chuan game ṭha tak a ni. 

A ṭha lai lakchhuah tur kan nei a, hmasawn mamawhna lai kan nei bawk - passing leh finishing lamah inzir belh kan la ngai. Kan ball khawihah kha aia ṭha zawk kha ka beisei ṭhin a, ka player-te hian hma an la sawn thei tih ka hria.