All England beiseitu Sindhu

Badminton inelna ngaihhlut All England Championshp 2021 chu vawiin aṭang hian Birmingham khawpuiah khelh a ni dawn, world champion ni lai PV Sindhu chuan Swiss Open lama a chet fuh lohna siamṭhain nomawi chawi theih a inbeisei.

Swiss Open khelh zawh takah Sindhu hian final a lut a, mahse Olympic champion Carolina Marin a ngam lo. Spanish nula hi All England-ah hliam vangin a inlan thei dawn lo a, a tel loh tur thu hi a sawi chiang tawh.

Marin chuan, "Swiss Open kan khelhnaah khan hliam ka nei, chu ka hliam chu a la dam loh avangin All England ka khel thei dawn lo, a rang thei ang berin badminton court chhunga lo kir leh ngei chu ka tum," a ti.

Tournament hi Super 1000 ni mah se Tokyo Olympic qualifier zingah a tel lo, hei vang hian player langsar inlan lo tur an tam. A bik takin Korean leh Chinese Taipei player an inlan dawn lo.

Sindhu bakah hian Saina Nehwal pawh a inlan dawn. World number 1 hlui Saina hian 2015 khan All England-ah hian pahnihna dinhmun a lo luah tawh, kuminah pawh. Anni pahnih bakah hian Indian player 17 an inlan ang.

First round-ah Sindhu hian Soniia Cheah a hmachhawn dawn, seeded pangana hi a kaltluang a nih chuan quarterfinal-ah player ṭha Akane Yamaguchi a hmachhawn thei dawn. Saina chuan a match hmasa berah Mia Blichfeldt a bitum thung dawn a ni.