Joshua leh Fury an inhnek dawn

Boxing ngainatuten an hmuh chak inhnek an hmu ngei dawn niin a lang ta - Anthony Joshua promoter Eddie Hearn chuan a boxer leh Tyson Fury inhnek turin inremna an siam tawh thu a puang!

 

Eddie Hearn chuan boxer pahnih inhnek tur hian vawi hnih fight nei turin contract an ziak niin a tarlang a, he inhneka chak zawk chuan heavyweight boxing-a kawnghren ngaihhlut hlawh pali chu a kawl vek dawn tihna a ni. 

 

Kum 31 mi Joshua hian WBA, WBO leh IBF world heavuweight title-a kawl mek a, kum 32 mi Fury hian WBC heavyweight kawnghren a kawl thung.

 

Hearn chuan, "Tunah chuan contract ziah tur ang chu kan ziak fel vek tawh a, boxing khawvela fight ropui ber thlen theihna tura a hun leh hmun ruat turin theihtawp kan chhuah ang," tiin a sawi. 

 

Joshua nena thawkdun Hearn chuan Middle East, Asia, Europe chhak lam leh America aṭangin boxer pahnih inhnek thlen duha dil an awm nual tawh thu a sawi a, "Thla tharah chuan kan tichiang thei tawh ang," a ti. 

 

Boxer pahnih hian fight-ah hian an kawnghren kawl lai chu an thap ve ve dawn a, heavyweight boxing-a kawnghren lian tham pali vawi khata an inchuhna hmasa ber a ni dawn. 

 

British boxer ropui Lennox Lewis chu heavyweight boxing-a kawnghren lian tham kawl vek hnuhnung ber a ni a, mahse, 1999-2000 inkara he dinhmun a luah lai khan WBO title kawl tel a la ngai lo thung.

 

Joshua hian vawi 25 fight-a hmachhawn tawhah vawi 24 hnehna a chang a, vawi khat a tlawm. June 2019 khan a title kawl lai pathum chu rin loh takin Andy Ruiz Jr. lakah a hloh a, mahse, December, 2019 khan intum nawn lehin kawnghren pathum hi a chhuhsak leh a ni. 

 

British boxer hian nikum December khan Kubrat Pulev-a hmachhawn leh a, Wembley Arena-a inhnekah kawnghren hi a hum nawn leh thei. 

 

Fury hian vawi 31 fight-a hmachhawn tawhah tlawm a la nei lo a, kum 2018 khan Deontay Wilder nen an inhnek ṭumin vawi hnih ngawt tlu mah se a tho leh zel a, a tawpah inhnehtawka puan an ni. 

 

February 2020 khan Wilder nen hian an intawng leh a, hnehna changin WBC heavyweight kawnghren a hlawh chhuak a ni - hemi hnuah hian fight erawh a nei leh tawh lo. 

 

Manchester tlangval Fury hian kum 2015 khan boxing legend Wladimir Klitschko hnehin WBA, IBF leh WBO title-a lo hlawh chhuak tawh a, hemi hnuah hian kum thum dawn chu hremna leh depression vangin a chawl - mahse, heng zawng zawng hi hnehin boxing khawvel a luhchilh leh a ni.