Bayern-in Lazio mikhual dawn
Bayern Munich-in zanin dar 1:30 hian Allianz Arena-ah khualmuala 4-1 a an hneh tawh Lazio an mikhual dawn. Hansi Flick-a hote tan hna harsa tur a awm tawh lo niin a lang a, Champions League quarterfinal lut turin Bavarians dinhmun a ṭha hle.
Bavarians-in Italian club an hneh hnuah FC Cologne, Borussia Dortmund leh Werder Bremen te an hneh leh tawh. Italian club erawh Bologna leh Juventus lakah tlawm zuiin match hnuhnung berah Crotone 3-2 in an hneh hram.
Hansi Flick-a'n Corentin Tolisso, Douglas Costa leh Tanguy Nianzou te inhliam vangin a chhawr thei dawn lo a, amaherawhchu a player pawimawhte an dam ṭha. Robert Lewandowski-a'n tun season goal 38 a khung tling tawh a, Polish striker ringawt pawh hi dan a harsa dawn.
Chutihrualin Thomas Muller a la chuai lo, Germany coach Joachim Low-a'n ram tan koh tum tawh lo mah se Muller hian Werder Bremen an hneh ṭum pawhin assist vawi hnih a nei. Tun season Bundesliga-ah assist vawi 13 nei tawhin season liam taa Bundesliga record vawi 21 khum theihna chance a la nei.
Lazio tan Allianz Arena-a hnehna chang turin goal li tal an khung a ṭul dawn a, season liam taa European Golden Shoe dawngtu Ciro Immobile a pawimawh ang. Italian forward Immobile hian tun season-ah goal 19 a khung tawh a, season liam ta pha lo mah se Bayern tlarhnung tan ven uluk a ṭul dawn a ni.
Zanin Inkhel Tur
Bayern Munich 1:30 AM Lazio
First leg-ah Bayern 4-1 in an chak
Chelsea 1:30 AM Atletico Madrid
First leg-ah Chelsea 1-0 in an chak
* FC Porto, Borussia Dortmund, PSG leh Liverpool ten quarterfinal an lut tawh.
* Quarterfinal leh Semifinal draw hi March 19, Zirtawpni tlai dar 4:30 hian Nyon, Switzerland-ah pawh a ni ang.