Mizo nula te an chak zel

Cricket Association of Mizoram (CAM) tirha kal Mizo nula an che fuh zel. Nimin khan Womens Senior One Day Trophy (2020-21) khelh laiah Manipur chu run 21-in an hneh a, match pathum an khelh tawh chinah hnehna an la chang vek.

Alur Cricket Stadium III, Bangalore a inelna neihah Mizoram hi ṭhum vawrah an vannei zawk. PC Vansangzuali'n run 84 zet a siam a, a run siam zat chiah hi captain Apurwa Bhardwaj chuan a siam bawk; Mizoram hian 221/4-in over 50 an hmang zo.

Manipur lam an che nawi duh bik lo, beiseiawm takin an che thei. Mahse, over 50 chhungin run 200 bak an tlin thei lo a, wicket nga an hloh. Mizoram tan Zuali'n over sarih a vawm aṭanga run 22 chauh pe chungin wicket hnih a la.

CAM team hian an match hmasa lamah Arunachal Pradesh leh Jammu and Kashmir te an lo hneh tawh bawk. Vawiin chawhma dar 9:00 hian a hmun ngaiah Sikkim an hmachhawn leh ang.

Plate group-ah team paruk an awm a, an inkhelh kual vek hnuah a sang berin knockout round an lut ang. Mizoram hian Sikkim bakah hian Pondicherry (March 19) leh Bihar (March 21) te an la hmachhawn leh bawk dawn a ni.