Europa League Nomawi inchuh tur Arsenal leh Chelsea
Pierre-Emerick Aubameyang-a hattrick hmangin Arsenal chuan Europa League semifinal an paltlang, Unai Emery naute hian Eintracht Frankfurt hnehtu Chelsea nen May 29, Nilainiah nomawi an inchuh ang.
Ningani zan Europa League semifinal second leg inkhelah Arsenal hian 4-2 in Valencia an hneh a, inkhel hmasa nen belhkhawmin 7-3 in an tlang. 2006 Champions League hnuah European football bika final an luh lehna hmasa ber a ni.
Goal a tam
Emirates Stadium-ah Arsenal hian 3-1 a hnehna an chan tawh avangin dinhmun ṭha tak chungin Spain an pan. Mestalla Stadium-ah Kevin Gameiro-a'n minute 11-naah goal hmahruai khungin Valencia beiseina siamsak mah se an duh hlimna erawh an sual chhuak zo lo.
North London club lamin Aubameyang hmanga an chhanlet hnuah Alexandre Lacazette-a'n hmahruaina goal a khung a, Sevilla leh Atletico Madrid striker hlui Gameiro-a'n goal khat dang nei leh mah se, Gabon forward Auba-a'n goal hnih dang a khung belh avangin La Liga club tan beisei tur a awm lo a ni.
Dortmund striker hlui Aubameyang hian tun season chhungin inelna hrang hrangah goal 29 a khung ta a, Premier League player zingah Sergio Aguero (31 goals) chiah a chungah a awm. Auba leh Lacazette ten season kal laiah an club tan goal 48 an thawk chhuah tawh.
Mr Europa League
Unai Emery-a'n Sevilla a enkawl laiin Europa League hi 2014, 2015 leh 2016 khan nomawi a chawi a, English club hi hlawhtlinna a chan pui leh thei a nih chuan manager zingah vawi li champion thei hmasa ber a ni ang.
Gunners manager Emery chuan, "Player leh min thlawptu fans ka chhuang hle, an theihna zawng zawng an hlan a, fak phu khawpin an awm a ni. Tawnhriat kan neih tawhte hi tun inelna hmachhawn nan hian kan hmang thei a, final chu inkhel harsa tak a ni ang. Tunah erawh rilru engthawl taka chawlh neih hun a ni," tiin a sawi.
Premier League-ah Arsenal hi palina an ni phak dawn lo a, nomawi duha an tuihalna a san tluk bawkin season thara Champions League an khelh duhna a sang dawn - UCL khel tura tling tawh Blues aiin champion an duhna a lian zawkin a rinawm.