Tu nge Premier League top scorer ni dawn? Salah, Aguero, Aubameyang leh Mane

Premier League tawp niah champion tur bakah top scorer tur a hriat chauh dawn. Liverpool forward Mohamed Salah chu season zawna top scorer nawn turin a dinhmun a ṭha a, amah hnaihtu Sergio Aguero, Pierre-Emerick Aubameyang leh Sadio Mane te aiin goal hnihin a khung tam zawk.

Egyptian forward Salah hian season a hmang ṭha tawk lo niin an sawi a, mimal lawmman bakah team of the tournament an thlan tawh chinah pawh a lang lo. Amaherawhchu a goal khung zat thlirin Salah hian season ṭha tak a hmang a, top scorer a nih ngei a rinawm a, ni ta lo pawh ni se 'one season wonder' tia sawi a rem tawh lo.

Premier League history-a striker ropui an sawi apianga lang tel tawh tur Sergio Aguero hian ṭum khat chiah top scorer chawimawina a la dawng a, goal khung tam ber Egyptian forward Salah chu inhliam vanga khel thei lo dinhmuna a din avangin Argentine forward tan beisei tur a la awm. Man City striker hian Brighton & Hove Albion an tlawh hunah goal hnih tal khung a mamawh a, thil theih niin a lang.

Arsenal forward Pierre-Emerick Aubameyang hi goal khung thei bik a ni a, Borussia Dortmund tana a khelh lai aṭang tawhin goal khung tam zingah a hming a lang ṭhin. Chutihrualin Gunners-in khualmualah Burnley an hmachhawn dawn avangin Gabon forward tan goal khung belh a awl ai dawn lo.

Liverpool forward Sadio Mane-a'n season ṭha tak a hmang a, Jurgen Klopp-a tlarhma tifamkimtu a ni. Senegalese forward hian Aguero leh Auba angin goal 20 khung mah se asssist a neih tlem avangin top scorer nih a harsa tawh dawn. Chutihrualin a khelhna Reds hian Champions League semifinal-ah thil theih loha ngaih an thlentir a, Barcelona an hneh ṭuma player pawimawh hi top scorer tur zinga thai bo a la rem lo.

Top scorer ni thei zingah Arsenal player Auba la tel mah se Gunners-in an legend Thierry Henry anga ropui an hmu leh lo. French striker khan a hun laiin top scorer chawimawina vawi li zet a dawng a, vawi thum dawngtu Alan Shearer ai pawhin record a nei ṭha zawk.

Amaherawhchu English forward Shearer hian Blackburn Rovers leh Newcastle United tan match 441 khelin Premier League-ah goal 260 a khung a, league history-a khung tam ber a ni. Henry erawh Arsenal tan match 258 chauh a khel hman a, chutichung chuan goal 175 a khung hman.

Mak ang reng tak erawh Premier League-a goal 208 zet khungtu Wayne Rooney-a'n khung tam lamah Shearer chiah tluk mah se vawi khatmah top scorer a ni lo.