Pathianni zanah Premier League hmawr bawkna Champion phu 2, No mawi chawi tur 1

Premier League-ah thiam leh ṭha chungchuang pahnih tan no mawi pahnih chu awm thei se Manchester City leh Liverpool te hnenah hlan a ni ang. Amaherawhchu club pakhat tan chauh no mawi siam a ni a, football ropuina turin lawmna leh lungngaihna mittui a luan a ṭul dawn.

Champion lai Manchester City-in Pathianni zan dar 7:30 hian Brighton & Hove Albion khelmual Falmer Stadium an tlawh dawn a, hnehna an chang a nih chuan no mawi an hum dawn. Liverpool-in Anfield-ah Wolverhampton Wanderers an mikhual dawn a, Citizen chetsual an chang ang.

97 a tawk lo maw? 

Liverpool hian point 94 an hmu mek a, Wolves an hneh chuan 97 an hmu dawn. Season liam ta khan Man City chuan point 100 hmuin an champion a, ṭum 25 danga champion-te zingah Reds point hmuh theih zat 97 hmu tling an awm lo.

Amaherawhchu Man City-in Brighton an hneh a nih chuan point 97 hi champion nan a tawk lo tihna a ni a, Reds-in an la chawi ngai loh Premier League no mawi an la chawi dawn lo tihna a ni bawk ang. Liverpool boss Jurgen Klopp chuan, "Kan tih theih awmchhun chu kan khingpui hneh a ni. Thilmak thlen kar a ni a, kan tan hnutchhiah a la awm a nih chuan a lawmawm khawp ang," tiin Barcelona lehthaltu chuan Premier League champion turin vanneih a ṭul thu a sawi.

Nimin tlai press conference-ah Jurgen Klopp chuan an player pawimawh Mohamed Salah leh Andy Robertson te an chhawr theih tur thu a sawi a, Roberto Firmino erawh a la inlan thei dawn lo. 

Reds hmachhawn tur Wolves hi club lian ngamtu an ni a, Klopp-a hote tan chetsual theihna a ni. Liverpool ṭantuten no mawi an chawi lo a nih pawhin rilru thawi dam nan chak ngei an duh dawn a, an chak zawh loh vanga no mawi an chan a nih chuan pawm thiam a harsa ang.

Premier League top scorer ni mek Salah hian league-a an intawn hmasak ṭumin goal a khung a, 2-0 in an chak. Chutihrualin Wolves hi FA Cup aṭanga Reds pet chhuaktu an ni a, Man City meuh pawhin Nuno Espírito Santo hote lakah hian point an hloh.

Amaherawhchu Reds-in Wolves an mikhualna hmun tur 'Anfield' hi club tenau tan chuan a hming ringawt pawh hi zamna tham a tling. He hmunah hian Klopp-a hoten inlehthalna ropui an thlentir a, Lionel Messi telna Barcelona chu khualmualah 3-0 zeta an hneh loh hnuin 4-0 in an hnet let - Anfield boruak a dang.

German manager Klopp chuan, "Club nena kan inkar hi a ni telin a ṭha zel. Ka naute hian hun harsaah pawh ṭha takin an khel zel a, ka hmaa inchhawp player-te hi an ṭha a ni," tiin a player-te a fak.

Manchester City-in Premier League table hnuai lama awm Brighton an hmachhawn dawn avangin champion-na hun ṭha hi an bawhpelh a rinawm tawh lo. Chutihrualin Pep Guardiola hoten hian hun rei tak chhung no mawi pali an beisei avangin team dang aiin match an ngah zawk a, an kawng a awlsam lo.

Man City hian January thla khan an elpui Liverpool chu Etihad Stadium-ah 2-1 in an hneh hram a, hemi ṭum hian John Stones chuan goalline aṭangin goal ngei tura ngaih a pet chhuak. Hemi ṭuma ball-in goalline a pelh lohna hi centimetre tlemte chauh a ni a, VAR-in a chhan.

Pep-a hote hian May thla tawp khan Burnley chu 1-0 in an hneh hram a, goal awmchhun khungtu Sergio Aguero ball petin goalline a pelhna chu centimetre tlemte tho niin VAR ṭanpuina an mamawh. Reds aia Man City dinhmun ṭhatna chhan hi centimetre tlem leh VAR a tih theih.

Burnley an hmachhawn hnu hian Leicester City chu 1-0 in an hneh hram. Goal awmchhun khungtu Vicent Kompany-a'n tun season-ah a vawi khat khungna chauh a ni a, manager bakah a khelhpuiten an ring ngam lo chungin a inringtawk. Man City an vannei a, chutihrualin vannei turin an huaisen a, an thiam tel bawk. 

Manchester City manager Pep Guardiola chuan, "UCL semifinal-a thil thlen dan leh Leicester City kan hneh dan kha football tan a ṭha a, English football tan a ropui," tiin tunkara thil thleng chugnchang a sawi.

Brighton nena an inkhel tur chungchang sawi chhunzawmin Pep chuan, "Brighton khelh dan kan zir uluk a, FA Cup ang thoin a harsa dawn. Goal khung hma a pawimawh dawn," tiin a sawi a, Kevin De Bruyne chu chhawr theih dinhmuna a din thu a sawi a, Fernandinho erawh FA Cup final-ah chauh a khelh theih a beiseiawm.

Pep-a hote hian Brighton hi FA Cup semifinal-ah an hmachhawn a, 1-0 chauhin an hneh. Man City hian an duh ber Champions League no mawi chawi lo mah se tualchhung no mawi pathum chawi thei dinhmunah an la ding. Citizen hian League Cup an chawi tawh a, Premier League zawh hian Watford nen May 18-ah FA Cup final an khel ang.

Premier League Golden Glove dawng tur a la hriat loh. City keeper Ederson leh Reds keeper Alisson ten tun season-ah clean sheet vawi 20 ve ve an nei a, season tawp niah a dawng tur a hriat chauh dawn.

Keeper ṭha pahnih hnaihtu Chelsea keeper Kepa Arrizabalaga leh Everton keeper Jordan Pickford ten clean sheet 13 ve ve chauh an nei pha a, hei hian champion dinhmun ding pahnih tlarhnung ṭhatzia a pholang. Ederson leh Alisson te hi an cleansheet neih zat a inang a nih chuan chawimawina hi an dawng ve ve ang.