Bayern an champion dawn?

RB Leipzig sporting director Ralf Rangnick-a'n, "Hnehna chan tumin kan khel ang," tiin zanin dar 7:00-a Bayern Munich nen an inkhelh tur chungchang a sawi a, he thu hi Borussia Dortmund tan ngaihthlak a nuam ang.

Bayern tan a zawna vawi sarih Bundesliga champion ni turin point khat bak hmuh belh a ngai tawh lo, Leipzig bakah hian Eintracht Frankfurt nen an la intawng leh ang. Pahnihna Dortmund tan nomawi chawi tur chuan thilmak a thlen a ngai tawh a ni.

German champion manager Niko Kovac chuan, "Inrinni zan hian league champion kan nih ngei ka beisei, mahse football-ah chuan thil thleng tur a sawi lawk theih loh," tiin a sawi. Bayern captain Manuel Neuer chu hliam vangin a la inlan thei dawn lo a, season tawpa Allianz Arena chhuahsan tur Franck Ribery leh Arjen Robben te tan an hun hnuhnung a ni zel tawh bawk ang.