Halep hnehin Bertens champion

Kiki Bertens chuan Simona Halep hnehin Madrid Open title a la a, tennis a khelh hun chhunga nomawi a chawi lian ber niin tun kara world ranking chhuak tharah palina a ni nghal ang.

Inrinni zan inkhelah Bertens hian Halep hi 6-4, 6-4 in a hneh. Romanian nula Halep hi champion ni sela chuan Naomi Osaka khumin world number 1 a ni ang - mahse pahnihna a nih avangin a chung berah a la awm thei rih lo.

Kum 27 mi Bertens hian kumin Madrid Open hi a khel ṭha hle a, match ruk a khelh chhungin set a hloh miah lo. He inelna bikah hian hmeichhe player zingah set hloh loa champion thei hmasa ber a ni.

Mipa singles lamah champion tura rinkai Rafael Nadal chu Stefanos Tsitsipas hneh loin semifinal-ah a tla. Greek tlangval hian Nadal lakah 6-4, 2-6, 6-3 a hnehna changin final a lut - nizan khan Novak Djokovic nen final an khel zui a, he thu buatsaih lai hian result kan hre hman lo.

Semifinal dangah Roger Federer vaw tlatu Dominic Thiem chu Djokovic hian 7-6 (7-2), 7-6 (7-4) in a lo hneh ve bawk. Clay court-ah Nadal leh Federer ten beisei an la phak lo a, Barcelona Open champion Thiem leh Tsitsipas te an khelh ṭhat avangin French Open boruak pawh a ngaihnawm zual tura ngaih a ni.