Run 373 siamtu England chak hram

England chuan Inrinni khan Pakistan nen ODI match nga an khelh tura a vawi hnihna chu an khel a, run 373 zet an vaw chhuak chungin run 12 lekin hnehna an chang.

Ageas Bowl, Southampton-a inkhelah hian ṭhumvawrah Pakistan an chak a, vawm hmasak an thlang. England batsman-te an che ṭha a, mi panga bat hman Jason Roy (87), Jonny Bairstow (51), Joe Root (40), Eoin Morgan (71) leh Jos Buttler (110) te zingah Root chauhin half century a siam lo, run 373 siamin mi pathum chauh an thi.

Pakistan tan opener Fakhar Zaman a che ṭha a, run 138 zet siamin Babar Azam leh Asif Ali ten run 51 ve ve an siam bawk. Amaherawhchu mikhual team hian an target sang tak chu an umpha lo a, wicket sarih hlohin over 50-ah run 361 an siam a, run 12-in target an pha lo.

ODI match thumna chu May 14, tlai dar 5:30 hian Bristol County Ground-ah khelh a ni dawn. Tun thla tawpah Cricket World Cup khelh ṭan a nih dawn avangin England leh Pakistan tan tuna ODI an khelh hi World Cup inpuahchah nan a pawimawh khawp ang.