Herrera-a'n 6-na United chhuahsan dawn

Ander Herrera chuan tun season tawp rualin Manchester United tana a contract a hmang zo a, kum 29 mi midfielder hian season tharah chuan club dang a zawm dawn tih a chiang.

Spain midfielder hian 2014 khan Athletic Bilbao aṭangin United hi a zawm a, Dutch manager Louis van Gaal-a'n duh taka a lakluh hi beisei angin a hlawhtling tawk lo. A chhuahna tur club hi chiang taka puan la ni lo mah se Paris St-Germain nen an inrem tawh niin khawtlang media te chuan an tarlang der tawh.

Man United hian nizan khan Old Trafford-ah tun season chhunga an league match hnuhnung ber an khel a, Ole Gunnar Solskjaer-a naute hi Championship lama tla tur Cardiff City lakah 2-0 in an tlawm a, point 66 hmu chungin paruknaah season an khar. Norwegian manager hian an match hnuhnung berah hian Herrera hi bench-ah pawh a dah lo a, United ṭantuten kum nga chhung Old Trafford-a cham tawh Spanish midfielder thlahna hun hi an nei lo.

Nizan inkhel dangah Chelsea leh Leicester City te goal awm loin an inhnehtawk a, pathumna ni tura an elpui Tottenham pawh Everton nen 2-2 a an inhnehtawk avangin Blues hi pathumna an ni. Arsenal-in an match hnuhnung berah Burnley chu khualmualah 3-1 in hneh mah se panganaah an lungawi a ṭul a, an hmelma Tottenham Hotspur hnuaiah season an khar.