United an mawi, Ajax leh Celtic an tla

Manchester United-in Ole Gunnar Solskjaer hnuaia Europa League-a an khelh ṭhat ber an tawng a, Ningani zan khan Old Trafford-ah Club Brugge 5-0 in an sawp. United hian aggregate-ah 6-1 in hnehna an chang. English club dang Wolverhampton Wanderers pawhin last 16 an lut a, Wolves hian khualmualah Espanyol 3-2 in hneh lo mah se aggregate-ah 6-3 in an chak.

Season liam ta Champions League semifinalist Ajax erawh first leg-ah Getafe 2-0 in an hneh lo a, an mualah 2-1 in chak mah se an tla ta tho. Scottish football-a roreltu Celtic-in Rangers hnung an zui thei lo a, Celtic Park-ah Copenhagen 3-1 a an hneh loh avangin aggregate-ah 4-2 in an chak lo.

Manchester United tan Club Brugge hneh hrim hrim hi lawmna tham a tling lo a, amaherawhchu Belgium club-a an chak dan zawk hi hlim veng vengna tham a ni thung. January-a United zawmtu Bruno Fernandes leh Odion Ighalo ten goal an khung a, inhliam vanga hun rei tak chawl tawh Scott McTominay-a'n inkhel bul ṭanin goal a khung. 

Hetah hian a la tawp lo - substitute Jesse Lingard-a'n assist a nei a, tun season-a match 34 chhunga goal la khung lo Fred-a'n goal hnih ngawt a khung. Old Trafford-ah United ṭha zawk an inlar a, Pathianni zan dar 7:30-ah Carlo Ancelotti enkawl Everton nen Goodison Park-a an inkhelh hunah eng ang chiaha ṭha nge an nih fiahin an awm ang.

United-in bul an ṭan ṭha a, Club Brugge defender Simon Deli-a'n an hna a tih awlsam phah bawk. Daniel James-a ball pet chu Deli hian a kutin a lo beng thla a, keeper Simon Mignolet-a dive hman avangin VAR hmangin rei fe ennawn a nih hnuah Brugge defender hi hnawhchhuah a ni.

Bruno Fernandes-a'n Watford laka awlsam taka a thun ang thoin minute 27-naah penalty hi a khung a, Portuguese midfielder hi United game siamtu a ni zui bawk. Minute 34-naah Fernandes-a ball pek fing tak chu Juan Mata-a'n Ighalo tan pe lehin Nigerian striker hian United tana bul a ṭan hmasak berah a pet goal.

Minute 41-naah Tominay-a'n goal ṭha tak a khung a, United hmun himah an awm tawh. Solskjaer-a hoten player 10-a khel Brugge lakah zah ngaihna an lantir lo a, Fred-a'n minute 83-na leh injury time-ah midfielder ṭhain an khung ṭhin dan angin a khung.

Brazilian midfielder hian Brugge hma hian United tan match 59 khelin goal khat leh assist vawi thum a nei a, Belgian club lakah hian goal hnih leh assist vawi khat a neih avangin a khelh ṭhat ber zan tiin a sawi theih.

Manchester United manager Ole Gunnar Solskjaer chuan, "Ka lawm takzet. Kan goal khung zat leh kan khelh dan khan inrintawkna min pe ngei dawn. Bul ṭan phat aṭangin kan khel ṭha a, chance kan insiam hnem. Red card an hmuh zawh kha chuan inkhel a zo tawh a ni ber," tiin a sawi.

Norwegian manager chuan sawi chhunzawmin, "Bruno hian danglamna a thlen a, first half-a goal thumah khan a inrawlh vek. Season chanve chauha rawn tel ni mah se team chhungah a leng em em a, kan mamawh tak kan la fuhah kan ngai," tiin Portuguese midfielder a fak.

Europe club lar Ajax-in khualmualah Getafe 2-0 in an hneh lo a, heti chung hian Dutch club hi tho chhuak leh theih tura ngaih an ni. Amaherawhchu, Dutch champion hian nipuia Chelsea zawm tur Hakim Ziyech chu hliam vangin an chhawr lo a, goal an chhuah hma bawk.

Spanish club tan Jaime Mata-a'n minute ngana lekah a khung a, 'away goal' hlu tak a nih avangin Ajax tan tlang turin goal li khung a ngaih phah. Erik ten Hag hote tan Danilo-a'n minute 10-ah siphurh a sut ṭhen nghal a, minute 63-naah Mathias Olivera-a'n an lamah tilut leh mah se Ajax-in Europa last 16 lut tura an mamawh zat goal hnih an khung thei tawh lo.

Season liam ta Champions League semifinalist Ajax-in UCL group stage aṭanga an tlak hnuah Europa League second round an paltlang zo lo.

Celtic leh Copenhagen te Denmark-ah 1-1 in an inhnehtawk tawh a, Celtic Park-ah Scottish club beiseina a sang zawk. First half-a inkhel thununtu Celtic-in goal an khung thei lo a, Tom Rogic-a'n goal ban a pet per avangin Copenhagen an vannei.

Danish club tan Michael Santos-a'n Jozo Simunovic tihsual hmang ṭankaiin minute 51-naah a khung. Celtic beiseina siam turin Odsonne Edouard-a'n minute 83-naah penalty aṭangin khung mah se Copenhagen tan Pep Biel (85') leh Dame N'Doye (88') ten an khung belh. Scottish club-in an tlarhnung phui loh an tuar a, Europa League aṭangin an tla.