India-in Buttler an ngam lo

India captain Virat Kohli che ṭha mah se Men in Blue-in Twenty20 match thumnaah England wicket riatin an hneh lo. Ahmedabad-a inkhelah hian Kohli hote bat hmasain run 156/6 an siam a, England tan Jos Buttler-a'n thi loin run 83 a siam a, over 18.2-ah run 158/2 siamin hnehna an chang.

Ṭhumvawra vannei England-in vawm hmasak an thlang. India tan captain Kohli-a'n ball 46 lekah run 77 a siam a, amaherawhchu thlawptu ṭha a neih loh avangin Men in Blue-in over 20-ah run 156 chauh an siam. England bat hun a thleng a, opener Buttler-a'n ball 52 lekah run 83 a siam. Jonny Bairstow-a'n thi loin run 40 a rawn vaw chhuak bawk a, mikhual team-in hnehna chang turin harsatna a nei lo.

England captain Eoin Morgan tan T20 match 100 a khelhna a ni a, kum 34 mi Morgan aia T20-a ram tana khel tam chu Shoaib Malik, Pakistan (116), Rohit Sharma, India (109) leh Ross Taylor, New Zealand (102) te chauh an awm.

India leh England hian zanin dar 7:00 hian match lina an khel dawn a, March 20, Pathianniah match ngana an khel leh ang.