Yaya Toure a la chawl lo!

Manchester City leh Barcelona midfielder hlui Yaya Toure chu inkhelh chawlhsan tawh angin a agent-in puang mah se inkhelh a la chawlhsan loh thu tun hnaiah a sawi chhuak.

Kum 35 mi midfielder hian December khan Greek club ṭha Olym­piakos-a a contract neihlai chu a titawp a, hemi hnu hian club dang a nei leh tawh lo - Zirtawpni khan a agent Dimitri Seluk chuan a player hi a chawlh thu a sawi zui. 

Toure chuan, "Ka hma hun chungchangah tun hnaiah thil chiang lo a awm. Mahse, chiang taka ka sawi duh chu football hi ka hmangaih em em a, kum tam zawk khel turin ka la inbuatsaih mek," a ti. 

African Footballer of the Year-a vawi li thlan tawh Toure hian kum 2009 khan Barcelona chu Champions League nomawi a chawi­pui a, a hnuah Manchester City zawmin kum riat a cham. 

English club tan hian match 316 inlan zuiin goal 79 a khung sak a, Premier League (3), FA Cup (1) leh League Cup (2)-ah te nomawi a chawpui. 

Toure chuan, "Coaching lam pawh­in ka ngaihtuahna chu a luah ṭan ngei a, mahse full time coach ni turin ka la inbuatsaih lo. Tun dinhmunah chuan inkhelh leh phawt ka tum a, ka chawlh hun a thlen chuan keimah ngeiin ka puang ang," tiin a sawi.