Brighton-in coach an ban

Premier League club Brighton & Hove Albion chuan manager Chris Hughton chu table-a 17-na nichunga season an khar hnuah an ban a, league-a a inhamtanpui chungin a hna a chan ta tho. 

Brighton hian an league match hnuhnung 23-ah vawi thum chiah hnehna an chang a, a hnu­hnung vawi kuaah chak an nei miah lo - Hughton-a'n a hna a chan phah ta. Kum 60 mi Hughton hian December 2014 khan Brighton hi a zawm ve chiah a, kum 2017 khan a vawi khat nan Premier League-ah a inhlankaipui. 

English top flight foot­ball-a an season hmasa berah hian 15-na an ni nghal a, tun sea­son-ah an him leh hram chungin ban a ni ta tho. Brighton chairman Tony Bloom chuan, "Premier League match 23-a vawi thum chiah kan chak khan dinhmun derthawng takah kan awm hman a, chuvangin tun hi inthlak danglam tura hun ṭha ber a ni," tiin a sawi. 

Newcastle United boss hlui Hughton hi Swansea City boss Gra­ham Potter chuan Brighton-ah hian a thlak tura ngaih a ni a, he thu buatsaih a nih lai hian a thlaktu tur tihchian erawh a la awm lo thung.