Entu nei loin Juventus leh Inter Milan

Pathianni zan dar 1:15 hian Serie A season kal laia inkhel pawimawh leh ngaihven hlawh bera ngaih pakhat chu khelh a ni dawn. Champion lai Juventus khelmualah Inter Milan an lenglut ang.

Inkhel boruak a sang dawn, nomawi inchuhna a ni tel bawk. Mahse, Italy rama coronavirus leng mek vangin Allianz Stadium-ah fans an kal thei dawn lo, a hmuna entu nei loin Italian club lian pahnih an inkhel dawn.

A zawna season riat champion tawh Juve hian hma an hruai mek, season tir lama kal vung tak Inter erawh tun hnaiah tlahniam deuhin pathumna an ni - Antonio Conte naute hi point rukin an hniam zawk, an chak lo a nih chuan Scudetto (league nomawi) beiseina a hniam tawh ang.

Kar hmasa khan Inter Milan hi an legaue match khelh hun tur sawnsak an ni, match khata an khelh tlemnaah hian chak ni se chuan Old Lady an hnaih sawt dawn. Inter hian entu nei loin Europa League an khel zo chiah a, entu nei lo bawka an inlan leh a ngai dawn.

Football Italia lamin a tarlan dan chuan, nimin tlai thleng khan Italy hmar lamah coronavirus kai mi 580 hmuhchhuah an ni tawh, mi 17 an thi. Tun kar tawp Serie A match 10 chu entu nei loin an khelh a ngaih phah dawn a ni.

Inter Milan CEO Giuseppe Marotta chuan, "Mipui hi football tan chakna hnar an ni a, an tel lo chuan boruak a nuam thei lo. Amaherawhchu tuna kan ram dinhmun thlir chungin kan pawm thiam a ngai, thuneitu lamin ro an rel dan hi kan pawm," tiin a sawi.

Ningani zanah Inter Milan hian Ludogorets 2-1 in an hneh a, inkhel pahnih belh khawmah 4-1 a hnehna changin Europa League last 16 an lut. Hnehna an chan hnuah manager Conte chuan boruak danglam tem chhunzawm tura inpeih a ngaih thu a sawi.

Fans awm loa inkhelh chungchang sawiin Conte chuan, "Player ka nih lai khan Italy leh Croatia chu fans awm loin kan inkhel tawh, a nihna takah chuan training kan ang zawk hialin ka hria. Tunah erawh ka naute hian Europa League lamah inzirna hun ṭha an lo nei lawk hi a lawmawm," a ti.

Italian manager chuan Serie A chungchang sawizawmin, "Allianz Stadium-a lenluh chu engtik lai mahin a awlsam ngai lo, kei pawhin tawnhriat ka lo nei tawh, tun ṭumah hian ka nuate chu an theihna zawng zawnga khel chhuak turin ka beisei dawn a ni," a ti. Squad a siksawi leh tur thu a sawi tel bawk.

Turin khawpuiah Conte hi a mikhual dawn lo, player a nih laiin season 13 a chamchilh tawh. Coach a nih hnuah pawh tuna Juventus team hi a dinthar leh niin, tuna season riat chhung an champion bul ṭantu a ni - a kaihhruaina hnuaiah vawi thum an champion.

Champions League nomawi duha tuihal Juventus hi Lyon laka chak lo hlim an ni a, an feh chhuahna ramah Ligue 1 club hi 1-0 in an ngam lo. Italian champion hi an hliam a, Pathianni zanah an hliam thawi dam nan Inter Milan hneh ngei an duh dawn.

League match 11 chhung goal khung tawh Cristiano Ronaldo chu Old Lady hmachhuan a ni leh dawn. Portugal captain kawppui tur hi tun thleng chuan manager Maurizio Sarri-a'n a la thlang fel tawk lo niin a hriat.

Argentine striker pahnih Gonzalo Higuain leh Paulo Dybala te a inkhelh chhawk tir a, tlarhma mai bakah midfield khelh tir dan nghet a la neih loh avangin an player neih ṭhat ngaihtuah chuan Juve hi an kal fawr tawk loah a theih theih.

Italian manager Sarri chuan, "Lyon lakah kha chuan training-na hmuna kan khelh angin kan khel chhuak zo lo, ball kan inpe kual vel kha a rang tawk lo. Inter lakah chuan tihsual nawn loh kan tum, hun rei lote inbuatsaihna kan neih chhungin ka naute pawhin hma an sawn," a ti.