Lewandowski tel lohna Bayern

Zanin dar 8:00 hian Bayern Munich-in Robert Lewandowski tel loin Hoffenheim khelmual Rhein-Neckar Arena an tlawh dawn. Polish striker Lewy a tel dawn loh avangin Bavarians manager lailawk Hans-Dieter Flick-a'n tlarhma a rem dan tur hriat a châkawm hle.

Bayern goal khung khawl Lewandowski hi hliam vangin kar li chhung a chawl dawn a, Hoffenheim bakah Augsburg, Union Berlin, leh Eintracht Frankfurt te Bundesliga-ah a hmachhawn thei dawn lo. DFB Cup quarterfinal-ah Schalke nen an inlan thei dawn lo a, Chelsea nen Champions League second leg an khelh hunah pawh a hmel hmuh a beiseiawm loh.

Hansi Flick hian Lewy tel loin tlarhma a siksawi ran a ṭul. Germany coach Joachim Low chuan Lewandowski dawta Bayern tana goal khung hnem ber Serge Gnabry chu tlarhmaah a chhawr ngam a, Arsenal forward hlui thlawp tur hian Philippe Coutinho leh Leon Goretzka te midfield-ah dah theih a la ni bawk.

Chutihrualin Flick-a hnuaiah Thomas Muller-a'n hmun pawimawh a chang a, Lewandowski aiawh tur hian Low-a duh loh Muller hi thlan a ni thei bawk. Mual sir lama Muller-a hna chelh turin Coutinho a inpeih nghal bawk ang.

Thlirna dang lehah chuan Muller leh Gnabry te an awmna ngaiah awmin kum 18 mi Joshua Zirkzee chu Lewandowski aiawh turin a thlan theih ang. Dutch forward Zirkee hian nikum November thla khan Bundesliga-a a ball khawih hmasa berah goal a khung a, Freiburg an hneh phah. 

Chutihrualin kum 18 mi Zirkzee tan mawhphurhna sang chelh a hautak dawn a, Flick-a'n Bayern manager hna a ngheta a chelh theih nan tawnhriat nei player a neih sa uluk taka a siksawi a ṭul dawn a ni.

Bayern elpui Borussia Dortmund-in zanin dar 8:00 hian Freiburg an mikhual dawn a, Bundesliga nomawi beisei chhunzawm turin chak ngei a ṭul. Pathianni zanah RB Leipzig-in palinaa awm Bayer Leverkusen an mikhual dawn a, nomawi inchuhna a nih theih bakah Champions League khel tur zawnna tih pawhin a sawi theih ang.