Season tawpah Daniele de Rossi a chhuak dawn

Italian legend Daniele de Rossi chuan a hmangaih Roma chu season tawpah a chhuahsan dawn a, kum 35 mi midfielder hian inkhelh erawh a la chawlhsan dawn lo - hmun dangah a kal dawn.  

Italy tan vawi 117 inlana goal 21 khungtu hian an khaw club Ostia Mare aṭangin Roma hi a pan a, a professional career ṭan nana hmangin match 615 a khelh sak a, goal 63 a khung - Roma tana inlan tam lamah 2017-a chawl ta Francesco Totti (786) chiah a tluk lo. 
De Rossi hian 2001 aṭangin Roma tan khel mah se league-ah a champion pui miah lo a, Coppa Italia (2) leh Supercoppa Italiana (1) nomawi a chawi. 

Roma hian May 26-ah Parma nen an league match hnuhnung ber an khel dawn a, a vanglaia club lian sawmna zawng zawng hnara rinawm thlangtu De Rossi tan Roma jersey ha chunga a match hnuhnung ber a ni ang. 

Italy tana 2006 World Cup nomawi chawitu hi Roma president Jim Pallotta chuan, "Giallorossi (Roma sawina) tana a jersey hnuhnung ber a hak hunah chuan kan mittui a luang ngei ang. Mahse, kum 36 nih dawn tawh hnua hmun danga chona hmachhawn a duhna hi kan zahsak a ni. 

"De Rossi hi kan tana a inpekna zawng zawng avangin Roma aiawhin lawmthu ka hrilh a ni. He club-ah hian engtik hunah pawh a lo kir duh a nih chuan a tan kan inhawng reng ang," a ti a, inkhelh a chawlhsan hunah pawh Rossi tan Roma-ah hna a awm tur thu a sawi.