Intercontinental Cup khel tur a chiang
All India Football Federation hnuaia ram leh ram inelna Intercontinental Cup chu July 7 khian khelh ṭan a ni dawn a, he inelna hi ṭum dang ang bawkin India chuan a thleng dawn a, Syria, North Korea leh Tajikistan an inlan bawk ang.
Bengaluru khawpuia khelh tur nia sawi inelna hi July 18 thleng awh tur a ni dawn a, Tajikistan tih loh India, Syria leh North Korea-te hi kumin kumtira AFC Asian Cup-ah khan an inlan vek. Intercontinental Cup-ah hian India chu champion lai an ni a, nikuma Mumbai-a inelna neih a nih ṭum khan Kenya nen final khelin an champion.
Asian Cup-a knockout round an inpetkai theih loh hnua insiamṭhat tum mek India hian coach thar Igor Stimac an nei dawn hnai tawh a, AIFF technical committee chuan Croatia international hlui hi Blue Tigers coach tura thlang fel tawhin AIFF thutlukna chiah an nghak tawh.
Igor hna hmasa ber tur erawh June-a khelh tur King's Cup a ni dawn a, Thailand-a neih tur inelnaah hian Blue Tigers hi Curacao nen an intum ang a, an chak chuan Thailand leh Vietnam inkhela chak zawk nen final an khel ang.