Indian Open-ah Mary Kom

MC Mary Kom chu May 20-24 chhunga khelh tur Indian Open boxing tournament-ah a inlan dawn a, ṭum danga a khelh ṭhan lohna 51kg category-ah a inlan ang.

Nikum Indian Open-ah khan Mary Kom hi 48kg huangah a inlan, kuminah erawh World Championships leh Olympic hmathlira nei chungin a category a tih danglam a ngai - inelna lian pahnih atana inbuatsaihna a ni nghal dawn.

Kum 36 mi Kom chuan, "51kg category atan inbuatsaihna ka nei ṭha tawk, inelna hi Assam-ah nghah a ni hi a lawmawm. North East hi boxing khel thiam tamna hmun a nih avangin talent nei ṭha hmuh chhuah an nih ngei ka beisei," a ti.

Manipuri boxer Kom-i hi world champion vawi ruk ngawt a ni tawh a, 2012 London Olympic-ah khan bronze medal lain India hmeichhe boxer ten tih theih loh ang hiala an ngaih chu a hlen chhuak.

Indian Open-ah hian mipa boxer 35 leh hmeichhe boxer 37 an inlan dawn a, champion-in Rs 1,76,076 an dawng ang a, pahnihna tan Rs 70,440 a ni thung ang.