Williams unau intawng dawn

Serena Williams leh Venus Williams te chu kum 21 hnua a vawi khat nan clay court-ah an intawng leh dawn ta. American unau hian Italian Open first round an paltlang ve ve a, zanin hian second round-ah an inhmachhawn ang.

Thawhṭanni zan Rome, Italy-a inkhelah vawi li champion tawh Serena hian Rebecca Petersen chu 6-4, 6-2 in a hneh a, kum 37 mi Serena-i'n thla hnih chhung hliam vanga tennis a khelh theih loh hnuah a dam tawh tih a rawn lantir.

Grand Slam vawi 23 champion tawh Serena hi March thla khan Miami Open-ah inlan mah se a khup hliam vangin a inhnukdawk a, a hnuah Indian Wells pawh damlohna vangin a khel thei lo zui. Italian Open-ah erawh a pasal Alexis Ohanian ṭawiawmna hnuaiah darkar khat leh minute 16 chhungin hnehna a chang.

Inkhel dangah Venus erawhin hnehna chang turin vanneihna a mamawh tel. 1999 Italian Open champion hian darkar thum chuang an inkhelh hnuah Belgian player Elise Mertens chu 7-5, 3-6, 7-6 (7/4) in a hneh hram.

Grand Slam vawi sarih champion tawh Venus chuan, "Serena khan first round a khel ṭha a, second round-ah pawh ṭha takin a rawn khel leh ngei ang tih ka ring," a ti. Serena erawhin a u Venus-i'n inkhel hautak hmachhawn mah se an intawn hunah thahrui a ngah a rin thu a sawi thung.