El Clasico: Spanish champion tur zawnna?

Pathianni zan dar 1:30-ah Real Madrid chuan league match khel turin Barcelona an mikhual dawn a, club lian pahnih hi La Liga-a table chung lam luah an nih avangin an inkhel boruak a 'hot' dawn.

Barcelona hian match 25-ah point 55 an nei tawh a, an hnuai chiahah point 53 neiin Real Madrid an awm. Pathianni zan inkhela chak zawkin La Liga-ah hma an hruai dawn tihna a ni a, khawvelin Santiago Bernabeu lam a hawi ang. 

Spanish football-a club lian pahnih hian tun season-ah thawnthu inang tak pahnih an nei a, chu chu beisei an phak loh dunna hi a ni. La Liga table chung lamah awm dun mah se European football-ah an ropui lo a, league lamah an chet chhiat season pawha el phak tu an nei lo hi an vanneihna a ni. 

Barcelona hian Champions League-a an match hnuhnung berah Napoli chu 1-1 in an inhnehtawkpui a, Real Madrid-in 2-1 in Real Betis an ngam lo thung - result ṭha neih loh hnu lawka El Clasico khelh hi an chak lo ve ve ang. 

Ernesto Valverde thlaka Quique Setien-a'n Barcelona enkawl hna a lak khan huaisen takin media a hmachhawn a, "Team thar ka zawm apianga ka tiam ṭhin chu hei hi a ni - kan khel ṭha ṭhin," tiin a sawi. 

Mahse, thu leh a tak ram a in ang lo a, Setien-a hnuaia Barca hi Valverde hunlaia Barca nen an danglamna a la lang tam lo. Lionel Messi meuh pawhin, "Hetiang chuan Champions League nomawi chawi theih a ni lo," a ti a, Setien-a hnuaia an khelh dan a duh khawp lo. 

Setien hian danglamna thlen a tum lo erawh a ni lo. Bernabeu-a City ngam loa Real tlawm lai kha a hmunah a assistant Eder Sarabia nen an en a, an duhtawk mai lo - City boss Pep Guardiola chu a thlenna hotel-ah an lenchilh zui!

Kum 61 mi Setien hi Johan Cruyff-a 'system' tuipui tu tia sawi a ni a, Barca-in coach atana an lak chhan zingah pawh a tel - Pep hi Cruyff-a hnuaia lo khel tawh a ni thung a, Setien hian Real hneh dan tur kil tin aṭangin a dap. 

'Santiago Bernabeu' tia sawi chuan footballer tam tak thauah a man nghal a, stadium ropui tak a nih avangin khelh châkawm mah se mikhual team tana a ken tel 'tlawmna' chuan club tam tak a ti khur ṭhin. 

Mahse, chu Bernabeu chu Real Madrid khelmual la ni rengin a awmna ngaiah la ding reng mah se, a ropuina a thamral ṭan a, club lian zinga chhiar lem loh te paw'n tlangnel takin an luhchhuah ta.

Real hi an khelmuala an inlan hnuhnung pathumah an chak zo lo vek a, chung zingah chuan Copa del Rey semifinal-a Real Sociedad an ngam loh leh Celta Vigo an inhnehtawkpui a tel. 

ṭha an nih avangin dem viau a harsa a, mahse he result zawng zawngin a ken tel chu hlauh lohna a ni - Barca-in he khelmuala lenluh hi an hlau lo tawp ang. 

Zidane, engtin nge ni dawn?

City laka Real tlawm chhanah coah Zinedine Zidane chu mawhpuh ber a ni. Manchester khaw club lakah mak takin Toni Kroos chu bench-ah a dah a, tlarhma lama khel ṭha awmchhun tih theih Vinicius Junior chu la chhuakin Gareth Bale a luhtir bawk. 

Zidane hian thutlukna siam sual nawn a duh lo ang tih a chiang a, a player-ten a rinna an chhan let a ṭul ve bawk. French manager   hi a vanduaina lam thlirsak chuan chhan theih tak a ni - pound maktaduai 150 man Eden Hazard-a'n beisei a phak loh piahlamah a inhliam reng.

Hazard hi Pathianni zanah pawh a inlan thei dawn lo a, Marco Asensio pawh a chawl rei ta. Real hian Cristiano Ronaldo a chhuah hnuah an la thlak zo lo - Karim Benzema tan Ronaldo hnutchhiah sulhnu a hrawl mah mah a, innghah nan Isco a tling tawk lo. 

Luka Modric hi a kum a tam ve ta tih a chiang reng a, Fede Valverde hi player ṭha tak ni mah se a la puitling tawk lo. Engkim hrilhfiahna awlsam ber chu 'Real-in tlakchhiat lam an pan' tih hi a ni a, El Clasico hi insiamṭhat bul 

ṭan nan hman an tum ang. 

February 27, 2019 khan Bernabeu-ah Barcelona-in 3-0 in hnehna an chang a, hei hi Copa del Rey semifinal second leg a ni - Barca-in an thawnthu hlui hi social media lamah an theh darh thar leh a, Real an tlawh hmain result hlui hmanga in fuih phur an tum. 

Barca hian Ousmane Dembele leh Luis Suarez tel loin 'pressing' lamah harsatna an tawk tih a chiang a, Pathianni zanah chak an duh chuan tun season-a match 29-a goal 23 khung tawh Lionel Messi leh match 35-a goal 14 khungtu Antoine Griezmann an pawimawh ang. 

Catalan club left back Jordi Alba a la inhliam a, a aiah Junior Firpo bawk a lut ang. Mahse, kum 23 mi defender hi Napoli lakah a mualpho a, Barca chak lohna lai a ni - Dries Mertens goal khung pawh a tihsual rah a ni a, insiamṭhat 

a mamawh. 

Napoli laka inhliam Gerard Pique a dam leh tawh a, Setien tan defender tawnhriat ngah hi bench-a dah aiin khelhtir a fuh zawk a rinawm a, tun hnaia khel ṭha lo Ivan Rakitic aiah Arthur chu El Clasico hmachhawn tura ngaih a ni. 

Game dang nena khaikhin chi a ni lo. Point thum tho inchuh tur ni mah se El Clasico chu a dan a danglam ṭhin a, Barcelona hneh hian player-te rilruah nasa takin hna a thawk thei. Team pahnihin he game ropui bikzia kan hria a, chak ve ve kan tum ang. El Clasico khelh dawn avanga rilrua zauthauna leh thil inmung awm hi thua sawifiah chi a ni lo. 

- Sergio Ramos, Real Madrid captain

Eibar    5:30 PM    Levante

Valencia    8:30 PM    Real Betis

Leganes    11:00 PM    Deportivo Alavés

Granada    1:30 AM    Celta Vigo

Sevilla    4:30 PM    Osasuna

Athletic Club    6:30 PM    Villarreal

Espanyol    8:30 PM    Atletico Madrid

Mallorca    11:00 PM    Getafe

Real Madrid    1:30 AM    Barcelona