Chhuak turin thutlukna ka siam - Griezmann Transfer-ah Barcelona thawm a lian

Antoine Griezmann chuan Atletico Madrid a chhuahsan tur thu a puang. French forward hi Barcelona-in a buyout clause euro maktaduai 120-in an lei chhuah a rinawm a, Griezmann hian May 18-a Levante an tlawh hunah Atletico tana a match hnuhnung ber a khel ang.

Lionel Messi khelhna Catalan Club hi La Liga-ah an champion tawh a, Copa del Rey nomawi chawi thei bawk mah se Champions League-ah Liverpool lakah an mualpho avangin inthuamṭhat an mamawh. Griezmann hma hian Ajax midfielder Frenkie de Jong an lalut tawh a, Dutch club captain Matthijs de Ligt an lalut dawn tih thawm a awm bawk.

Player chungchuang Griezmann
Kum 28 mi Griezmann hian sulhnu ṭhahnem tak a hnutchhiah tawh a, Messi leh Cristiano Ronaldo te chawi loh FIFA World Cup thlengin a chawi tawh. 

French player ni mah se Spainish club Real Sociedad aṭangin a inzir chhuak a, kum 2014 khan Atletico Madrid a zawm. Griezmann hian senior team-a kum nga a awmna Sociedad hi 2009-10 season khan Segunda División-ah a champion pui a, La Liga a kaipui. Atletico-ah record duhawm zawk a nei a; Europa League, Super leh Supercopa de Espana-ah te vawi khat ṭheuh nomawi a chawi.

An ram France erawh 2010 Euro Under 19-ah a champion pui a, nikum khan inelna zawnga champion châkawm ber World Cup-ah Les Bleus nomawi a chawipui. Mimal chawimawina ṭhahnem tak a dawn zingah Euro 2016-a golden boot leh best player a dawn kawp a langsar a, 2018 World Cup-ah pawh silver boot leh bronze ball a dawng kawp leh bawk. La Liga-ah pawh best player a ni tawh a, Ballon d'Or pawh dawng pha chiah lo mah se pathumna ṭum hnih a ni tawh a ni.

Hlawhtlinna um?
Griezmann-a sulhnu a ropui a, amaherawhchu a theihna thlirin a thlen tur ang a thleng lo. French forward hian Atletico Madrid hmangaih mah se league nomawi em pawh chawi loa football chawlhsan a ngai ngam lo niin a lang.

Atletico Madrid forward chuan, "Kum nga chhung hun duhawm tak ka hmang a, ka hun tawnah ka lawm takzet. Kawng engkima min ṭawiawm ṭhintu supporter-te bulah ka thutlukna hrilh hi ka bat a ni a, chona thar hmachhawn tur leh thlil thar tem turin ka chhuak dawn. Dik taka sawi chuan ka kawng thlan hi a harsa a, amaherawhchu chhuah hi ka tan a ṭhain ka hre si," tiin chhuah a tum chungchang twitter-ah video hmangin a pholang.

French forward hian Atletico tan match 256-ah goal 133 a khung a, season nga a khelh chhungin club top scorer a ni vek bawk. Theihna nei sang bik nei a nih avangin Griezmann hi Barcelona pawhin an awhna a rei tawh a, December 2017 khan Atletico chuan Catalan club dawr dan dik loh avangin FIFA-ah an zualko tawh. Nikum khan Griezmann hian Barca sawmna a hnawl leh bawk.

Atletico hian Griezmann bakah player ṭha pahnih dang an chan dawn. Defender Lucas Hernandez-a'n Bayern Munich zawm turin thutlukna a siam tawh a, captain Diego Godin pawhin contract thar ziah a tum loh thu a tichiang tawh bawk.

Barcelona lam chu...
Antoine Griezmann hian Barcelona a zawm dawna a lan tak avangin Nou Camp-a Philippe Coutinho hmalam hun a chiang lo nghal. Brazilian midfielder hi match hnuhnung bera Getafe 2-0 a an hneh ṭumin Barca ṭantuten an au el a, hliam vangin an la chhuak bawk.

Coutinho hian pound maktaduai 142 zetin Liverpool aṭangin Barca hi zawm mah se eng ruai a ang lo a, amah phu tawka dawrtu an awm chuan Catalan club-ah hian a awm rei a rinawm loh. Barcelona hian Coutinho chhuahtir turin squad an nei chhah tawk a, La Masia aṭanga player an chherchhuah reng bakah an mamawh tak player lei nana sum an sen huai avangin hun rei tak chu Spanish football an awp tawh a. Season tharah chuan tun hnaia an tlak hniamna Champions League nomawi chawi ngei an tum ang.