Serena Williams a inhnukdawk

Grand Slam vawi 23 champion tawh Serena Williams chu a khup na vangin Italian Open aṭangin a inhnukdawk a, second round-ah a u Venus Williams nen an inkhel tur chu ṭhulh a ngaih phah - inkhel hah loin Venus a tlang.

Kum 37 mi Serena chuan, "Ka inlan thei lo hi a pawi ka ti, French Open chu khelh theih ka inbeisei a, nakkumah pawh Rome-ah hian kan inhmuh leh ngei ka beisei," tiin season tharah pawh tennis khelh chawlhsan mai a la tum lo hle.

American player Serena bakah hian world number 1 hlui Caroline Wozniacki chu a ke na vangin a inhnukdawk bawk. Wozniacki hi a match hmasa berah Danielle Collins nen an inhmachhawn a, set khatna 7-6 (7-5) in a hloh hnuah a inkhel zui thei lo. Kum 28 mi Wozniacki hi tun hnaiah hliam vangin a buai ngun hle, Marid Open-ah khan first round-ah Alize Cornet nen game thum chauh an khel hman tihin a hnungzâng na vangin a khel zui thei lo tawh bawk.

Wozniacki khelh theih loh vanga tlang ta Collins hian a match lehpekah chuan Grand Slam vawi hnih champion tawh Garbine Muguruza a hmachhawn leh ang. Nizan khan world number 2 Simona Halep-i'n a match hmasa ber a khel a, he thu buatsaih lai hian result kan hre hman lo.

Clay court inelna lian ber French Open hi May 26 aṭangin khelh ṭan a ni tawh dawn a, player langsar pahnih Serena leh Wozniacki te tan damlo chunga inkhelh luih ai chuan inenkawl dam hma a finthlak ang.