Pep leh Klopp-a tluk loh Chris Wilder

Sheffield United manager Chris Wilder chu League Managers Association Manager of the Year atan thlan a ni a, Wilder hian he dinhmun luah tur hian Manchester City boss Pep Guardiola, Liverpool manager Jurgen Klopp leh Norwich City coach Daniel Farke te a khum!
Kum 51 mi coach hi LMA Awards-a chawimawina sang ber a dawn bakah hian Championship manager of the year lawmman hlan a ni bawk - Sheffield hi season thara Premier League khel turin a hruai thleng a ni. 

City tana league nomawi chawitu Guardiola chu Premier League manager of the year atan thlan a ni a, Pep hian he chawimawina dawng tur hian Klopp, Tottenham manager Mauricio Pochettino leh Wolves boss Nuno Espirito Santo-te a khum. Lincoln City boss Danny Cowley chu League Two-a manager ṭha berah thlan a ni a, Luton Town manager Mick Harford chu League One coach ṭha berah thlan a ni thung.

Hmeichhe lamah Joe Montemurro chu Women's Super League-a Arsenal a champion pui avangin WSL manager ṭha ber chawimawina a dawng a, Tottenham boss Karen Hills chuan WSL-a a team a inhlankaipui avangin Championship manager 
ṭha ber chawimawina a dawng bawk. 

Ipswich Town-a kum 65 zet hna a thawh hnuin Pat Godbold chu LMA Service to Football award chawimawina pek a ni.