Spurs vs Liverpool: Referee tur a chiang

June 1 zana Tottenham leh Liverpool-in Champions League final an khelh tur atan referee a chiang a, Slovenian referee lar Damir Skomina chuan he inkhel hi a kaihruai ang. 

Kum 42 mi referee hi Manchester United-in sawisel hlawh taka Paris St-Germain laka penalty an hlawhchhuah ṭuma referee kha a ni a, United hmelma kumhlun Liverpool tan thu hriat nuam a ni lo mai thei. 

Champions League last 16-a United-in 3-1 a PSG an lehthal ṭum khan injury time-ah Red Devils hi penalty pek an ni a, Marcus Rashford chuan goal-ah chantirin away goal rule hmangin an tlang phah. 

PSG forward Neymar chuan referee hi social media lamah na taka a sawisel avangin match thum chhung atan hrem a lo nih phah tawh. 

Skomina hi 2017 Europa League final-a Manchester United-in Ajax an hneh ṭum khan referee a ni a, 2013 Champions League final-a Borussia Dortmund leh Bayern Munich inkhelah fourth official a ni tawh bawk. 

Slovenian referee hi amah ang thoa Slovenia mi Jure Praprotnik leh Robert Vukan te chuan assistant niin an pui ang a, Spain mi Antonio Mateu Lahoz chu fourth official a ni ang.