Jail tang chunga medal dawng tur Kokorin

Russia international Alek­sandr Kokorin chu sorkar official kut a thlak avangin thla 18 tang tura hrem ni mah se a club khelhna Zenit Saint Petersburg chuan Russian Premier League nomawi an chawi hnuin an player chu medal an pek ve tur thu an sawi. 

Kokorin hi nikum aṭang tawh khan Police kutah a awm a, May 8 khan thla 18 chhung lung in tang tura hrem a ni - thutlukna siam a nih hmaa lung ina a hun hman tawh nen chhut sak a ni a, December 2019-ah chhuah zalen a ni ang. 

Russia tan vawi 48 inlana goal 12 khungtu forward hian Zenit tan tun season-ah league match thum chiah a khel hman a, mahse Zenit president Aleksandr Medvedev chuan, "Kokorin hi kan nghak ang a, amah ngeiin medal hi a dawng thei ang," tiin a sawi. 

Kokorin ṭhianpa Krasnodar midfielder Pavel Mamaev pawh thil thleng vang hian thla 17 chhung tang turin hrem a ni bawk.