Suzuki Gixxer Pro Volleyball League 2019
Hmeichhe champion Durtlang
Nilaini zan khan Suzuki Gixxer Pro Volleyball League 2019 hmawr bawk thawh khatna neih a ni a, hmeichhe inelna huangah Durtlang chuan Bungkawn hnehin an champion - mipa junior inelna lamah Anastasia Electric Veng-in nomawi an chawi bawk.
Tualchhung volleyball inelna sang ber hi nizan khan mipa senior team final khelh chhunzawm a ni a, nomawi la chawi ngai lo Durtlang North leh Chhinga Veng Spikers te an intawng a, he thu buatsaih lai hian result kan hre hman lo.
Hmeichhe champion
Chawnpui Sports Centre-ah Durtlang chuan Bungkawn 22-25, 25-20, 27-25, 22-25, 15-12 (3-2) in an hneh a, Mizoram Volleyball Association hnuaia buatsaih PVL bika champion thei pahnihna an ni.
Chawnpui Sports Centre-ah Durtlang chuan Bungkawn 22-25, 25-20, 27-25, 22-25, 15-12 (3-2) in an hneh a, Mizoram Volleyball Association hnuaia buatsaih PVL bika champion thei pahnihna an ni.
Final khelh hmain Durtlang hi rinkai lo zawk an ni a, league round an intawn tawhnaah Bungkawn hian 4-1 in an ngam. Nomawi inchuhna inkhelah pawh bul ṭan fuh zawk an ni a, Lallawmkimi Khenglawt leh F. Lalparmawii-te chet ṭhat chhawr ṭangkaiin set pawh an la hmasa.
Mahse, Bungkawn lam hi boruak sang laiah an tawnhriat neih tlem a lang a, set la tur zawk hriat harsa khawpa an inel tawk laiin Durtlang bawk an chefuh leh ṭhin. Durtlang tan Lalmuanpuii chu 'Best Player' ni khawpin a khel chhuak a, captain FP Lalduhkimi leh Lalramliani te an hmuhnawm hle bawk.
A vawi hnihna
Pro Volleyball League-ah hian hmeichhe inelna hi ṭum hnih neih a ni tawh a, Durtlang chiah hi team inlan nawn thei an ni. 2017 khan final an lut pha lo a, inelna neih hmasak hian Power Department Sporting Club an champion.
Pro Volleyball League-ah hian hmeichhe inelna hi ṭum hnih neih a ni tawh a, Durtlang chiah hi team inlan nawn thei an ni. 2017 khan final an lut pha lo a, inelna neih hmasak hian Power Department Sporting Club an champion.
Kuminah beiseina sang tak nen Durtlang an inlan nawn, league round lamah erawh team pali inel zingah Bungkawn an chungnung - anni hian Durtlang tana a khelh laia Best Emerging Player-a thlan lo ni tawh F. Lalrampari an kawl avangin beiseina pawh an nei sang hle.
Amaherawhchu, Durtlang lamin PVL an khelh tawhna tawnhriat an neih an chhawrṭangkai a, dinhmun hnuai hnung zawka an din lai pawhin an chiai lo. Tualchhung hmeichhe player ten hma an sawn theih nana buatsaih inelna tihlawhtlingtu an ni hi a mak lo.
Junior champion Anastasia
Suzuki Gixxer Pro Volleyball League 2019 Junior team champion hmasa ber ni turin Anastasia Electric Veng chuan Thutak Nunpuitu Team 25-21, 16-25, 25-18, 25-18 (3-1) a hnehin nomawi an chawi.
League round lama hmahruaitu Anastasia hian kum 18 hnuailam inelna an thunun chhunzawm, an intawn hmasaka set hloh loa an hneh tawh lakah hnehna chang turin harsatna an tawk lo - captain C. Zonunmawia chu 'Best Player' atan thlan a ni.
Kumin Junior League-ah hian senior team pasarih - Durtlang North, Chhinga Veng Spikers, Anastasia Electric Veng, Hunthar, Chanmari West leh Tuichangral ten team an nei vek a, mipa senior team an inkhelh hmain match an nei ṭhin.
Senior huangah TNT chauh state pawn player chahlut loa khel awmchhun an ni a, hneh nei loin table mawngphah luahtu an ni. Junior lamah erawh league round bikah pahnihna an ni, coach Sangthankima Sailo kaihhruaina hnuaiah huaisen takin final khel mah se an tum ram erawh an la thleng rih lo a ni.