Spurs an ngai reng dawn lo

Tottenham Hotspur-in stadium thar sak vangin player thar an lalut lo, chutichung chuan Champions League final an lut a, Premier League-ah palina an ni bawk.

Tun nipuiah erawh ngawi reng thei dinhmunah an ding tawh lo ang. An player pawimawh Christian Eriksen chuan contract a pawtsei duh rih lo a, kum 2020 thleng chauh contract a neih tawh avangin se zawl chhuah thei dinhmunah an ding. 

Chutihrualin Eriksen hi club lian Real Madrid leh Barcelona ten an dawra chhuah an phal thei dawn a nih chuan contract pawhsei theih dan a awm. Engpawhnise Danish midfielder Eriksen hi a chhuak a nih chuan Spurs hian sum pawh nei se a hmun ruak zau tak hnawhkhah a har ang.

Defender Toby Alder-weireld pawh kum khat chiah contract a nei tawh a, release clause pound maktaduai 25 chauh a nih bawk avangin Belgian defender hi chelh a harsa dawn. Jan Vertonghen pawh 2020-ah a contract a tawp dawn a, an player pawimawh te hi an chelh thei a nih pawhin tlarhnung thuam ṭhat an la mamawh tho.

Tlarhma lamah Fernando Llorente chu kum 34 mi a nih tawh avangin Spanish striker thlakna tur naupang zawk an mamawh a rinawm. Aston Villa captain  Jack Grealish leh Crystal Palace Wilfried Zaha bakah Fulham wing back Ryan Sessegnon te chu Spurs nena sawi zawm an ni mek.