City an chak; Spurs an tla!

Manchester City chuan FA Cup quarterfinal lut turin Sheffield Wednesday chu 1-0 in an hneh a, Sergio Aguero chuan inkhela goal awmchhun hi a khung. 

Tottenham Hotspur erawh mang chhiain a la kiansan thei rih lo. Norwich City nen 1-1 a an inhnehtawk hnuin penalty hmanga chak zawk zawn a ni a, 3-2 in an tlawm. Leicester City-in 1-0 in Birmingham City an hneh bawk a, minute 82-naa Ricardo Pereira-a goal khungin Foxes a chhanhim. 

Nilaini zan hian FA Cup quarterfinal-a inhmachhawn tur draw neih nghal a ni a, Newcastle United leh Manchester City inkhel tur leh Leicester City-in Chelsea an mikhual tur chu en châkawm a ni. 

Pep Guardiola nauten 80% ball chang chungin vawi 20 shot nei mah se 'chak hram' tih hman a ngai. Sheffield Wednesday-in an mikhual an hre chiang a, Championship club hian tlarhnungah players an remkhawm. 

Sheffield Wednesday lamin, "Nawr loh pawhin venhim tal," tin thupuiah an nei a, an tlarhnung an ven ṭhat viau rualin City tlarhnung an khawhar hle - Claudio Bravo-a'n hna a nei mang lo a, vawi khat chiah shot a hmachhawn!

City hian minute 48-naah a vawi khat nan target-ah shot an nei ve chauh a, Aguero erawh dan reng theih a ni lo - Argentine striker class hian minute 53-naah a ke vei lam hmangin goal a rawn khung a, City-in chak nan an hmang zui. 

Aston Villa hneha League Cup nomawi an chawi ṭuma goal khungtu Aguero hian FA Cup-a match 22 a khelh tawhah goal 20 a khung tling ta a, a record a chhuanawm hle. 

Manchester City-in FA Cup quarter-final an lut a, hetihrual hian chanchin lawmawm lo an nei tel. Midfielder pawimawh Kevin de Bruyne chuan Manchester derby a khel thei lo mai thei. 

Pathianni zan dar 10:00-ah City hian league match khel turin Manchester United an lenchilh dawn a, Carabao Cup final an khelh ṭuma inhliam KDB tan inlan lohna chance a sang zawk. City boss Pep Guardiola chuan, "Kevin-a in fit tawk lo. Engtia rei nge chawlh a mamawh dawn ka hre lo a, mahse a rei loh hram erawh kan beisei," a ti a, KDB hian Sheffield pawh hi a hmachhawn ve lo a ni. 

Carabao Cup final an khelh avang khan City hi Arsenal nena league match an khelh hun tur sawn a ni a, March 11 zanah Gunners nen hian an inkhel dawn - United leh Arsenal a zawnin an hmachhawn dawn a, a hautak ang. 

Tottenham-in inelna hrang hranga an match hnuhnung pathumah hnehna an chang zo lo a, Norwich lakah insiamṭhat an beisei. Mahse, Tim Krul ropui zan an tawng a, Spurs an vanduai leh ta. 

Spurs hian minute 13-na lekah Jan Vertonghen hmangin goal hmahruai an khung a, Giovani lo Celso-a cross ṭha zet chu Belgian defender hian a tauh lut. London club-in inkhel an thunun zui lo a, Norwich zawk an hlauhawm. 

Emiliano Buendia leh Lukas Rupp te hun ṭha neih chu Michel Vorm-a'n a dansak a, mahse minute 78-naah a tihsual vanga Josip Drmic-a'n a khung zui avangin a hming ṭhatna chu amah bawkin a thai chhia. Extra time thlengin goal dang a lut lo. 

Penalty pet a ni a, Spurs tana Eric Dier-a'n a pet luh hnua Norwich tana Kenny McLean-a pet hmasak ber chu Vorm hian a dang. Mahse, Vorm ang thoa Dutch goalkeeper Krul-a hun a in her chhuak a, Troy Parrott leh Gedson Fernandes pet a dang a, Erik Lamela chuan cross bar a tih per bawk avangin penalty-ah 3-2 in Norwich an chak. 

Keeper pahnih Krul leh Vorm lansarh zanah player langsar dang an awm a, a hming chu Eric Dier a ni. English midfielder lansarah dan erawh a duhawm lo a, inkhelh zawhah fan pakhat chu tlan chilhin buaina a siam. 

Spurs fan nia an sawi hi sawm bikte ṭhutnaa ṭhu a ni a, Dier chu ṭawngkam mawi lo takin a sawisel. Hei hi Dier-a unaupa chuan a hrethiam lo a, an buai. Dier hi inkhelh zawhah fan lam pan hian a tlan chho a, security an inrawlh hman avangin buaina lian tham a chhuak lo. 

Spurs boss Jose Mourinho chuan, "Professional tan chuan tih chi a ni lo a, mahse Dier hi ka dem lo. Kha fan khan Dier a sawisel a, a bul lawkah a chhungte an awm a, Dier-a nau pawh awmin a lawm lo hle. Dier hian a tisual ngei a, mahse hrem tur a ni lo," a ti a, fan hi Spurs fan a nih tak tak a rin loh thu a sawi zui.

Mourinho chuan, "Sawm bikte ṭhutnaa ṭhu ṭhenkhat hi sawmna an neih avanga ṭhu ve mai an ni a, fans tak tak pawh an ni lo. Kan fans dik tak chuan minute tawp thlengin min pui a ni," a ti. 

Match nga zet a zawna hnehna an chan zawh loh hnuin Leicester-in hnehna an chang a, FA Cup quarterfinal lut turin Birmingham City chu 1-0 in an hneh. Foxes-in Blues an hmachhawn hmain an thiampuipa Jamie Vardy an chhawr theih loh tur thu an hria a, mahse an striker chhuanvawr tel loin harsatna an tawk lo. 

James Maddison chuan cross bar a tih per a, an match hnuhnung panga angin an vanduai leh dawn emaw an inti hman - mahse a ni lo, hun tawp nan minute sarih chauh a awm tawh tihah Ricardo Pereira chuan goal a rawn khung.

Blues tan chhan letna hun a awm tawh lo a, Foxes an chak ve leh ta. Coach Brendan Rodgers chuan, "Kan khel ṭha takzet. 1-0 a nih hi chuan hun tawp lam chu 'indona' ang mai a ni ṭhin a, kan ti "ṭha takzet a ni," tiin a sawi.