ISL semifinal Mizo tamna Chennaiyin vs FC Goa

India rama football league sang ber Indian Super League pawh a hmawr an bawk hnai ta a, zanin dar 7:30 hian semifinal-ah Mizo tamna Chennaiyin FC leh FC Goa an inkhel dawn.

Chennai club-ah hian Jeje Lalpekhlua, Zohmingliana Ralte, Jerry Lalrinzuala, Lallianzuala Chhangte leh Laldinliana Renthlei an awm a, Jeje leh Zotea erawh hliam vangin tun season-ah an la inlan lo thung. 

Chennaiyin player pawimawh Lianzuala chuan, "Semifinal khel tur team dangah Mizo an tam lo a, Mizo team anga min ngaia min ṭan vek turin Mizo mipui ka sawm. Kan inkhel lo en se, min lo ṭawngṭaipui se kan duh a ni," tiin Vanglaini a hrilh a, Goa club-a Mizo awmchhun Lalawmpuia chu FC Goa tana la inlan lo a ni. 

Pathianni zan ISL semifinal inkhel dangah Bengaluru FC chuan ATK an mikhual dawn bawk a, chak tur zawk rinthiam a harsa. ISL semifinal hi home & away-a khelh tur a ni a, away goal rule hman a ni dawn. 

Chennaiyin-ah Jeje leh Zotea te an inhliam a, senior player pahnih inhliam laiin Jerry, Lianzuala leh Dinliana ten Mizo hming ti ṭhain game hmuhnawm an pho chhuak ṭhin thung. 

Mizo player pathum hi Chennaiyin boss Owen Coyle tan chuan player pawimawh an ni a, zaninah pawh FC Goa hmachhawn turin bul an ṭan ngei a rinawm.

Lianzuala chuan, "Season bul kan ṭan chhe em em a, kan match hmasa paliah goal kan khung lo. Rilru a hnual a, a hrehawm takzet. Pathian zarah tun hun hi kan thleng thei," a ti. 

Lunglei tlangval hian match 18-ah goal nga khung tawhin Hero of the Match-ah vawi hnih thlan a ni a, Emerging Player of the Match-ah vawi nga thlan a ni - Jerry leh Dinliana hian Emerging Player of the Match chawimawina vawi hnih ve ve an dawng tawh bawk. 

Chennaiyin hian beisei angin season bul an ṭan lo a, match hmasa paliah goal an khung lo. Coach John Gregory-a'n mawhphurhna lain November 30 khan a bang a, hetihlai hian team 10 inelnaa an dinhmun chu pariatna a ni. 

Bolton Wanderers boss hlui Coyle a lo lut a, danglamna nasa takin a thlen. Burnley leh Blackburn Rovers pawh lo enkawl tawhtu hian team thawhhona ṭha chu thupui berah a nei a, a player-te chu inkawmngeih turin a duh. 

Lianzuala chuan, "Kan inkawmho tam a, a chang chuan movie kan en ho a, inpawh takin kan awm. Chu chuan thawh hona a ti ṭha a, result ṭha kan neih phah," a ti a, team work chu an chakna hnar a nih thu Vanglaini a hrilh. 

Lunglei tlangval chuan, "A tirah kan khel ṭha lo a ni mai a, tun hnaiah keini aia khel ṭha bik an awm chuang lo. FC Goa hi team ṭha tak an ni a, mahse kan hneh thei tih kan hria," a ti. 

Chennaiyin tan Nerijus Valskis chuan match 17 khelin goal 13 a khung bakah assist vawi nga a nei. Brazilian midfielder Rafael Crivellaro chuan match 17-ah goal sarih khungin assist vawi ruk a nei a, player pahnih hi an pawimawh dawn. 

Lianzuala tlan chakna chu tlarhnung nawr nana pawimawh a ni leh dawn a, Coyle-a'n, "India tan chanchin lawmawm an ni," tih hiala a sawi Jerry leh Dinliana hi tlarhnung lama player ṭangkai tur an ni. 

Season hmasa ang thoin Ferran Corominas chu Goan club innghahna a ni a, Espanyol tana Copa del Rey nomawi lo chawi tawh forward hian match 15-ah goal 14 khungin assist vawi li a nei thei!

Match 14-a goal 11 khunga assist vawi 10 neitu Hugo Boumous hi player thiam bik a ni a, tlarhnung laia ding Mourtada Fall hi Senegal tana vawi thum inlan theih a nih avangin a thiam tih a chiang. 

Pathianni zan dar 7:30-ah ATK-in Bengaluru an lenchilh dawn a, Bangalore club hi an hnual lai tak a ni - AFC Cup playoff aṭangin Maziya-in an pet chhuak a, hemi hmaa ISL-a an match hnuhnung pathumah an chak zo lo. 

Champion lai tan Spanish defender Juanan leh defensive midfielder Erik Paartalu chu innghahna an ni a, tlarhma lamah match 15-a goal kua khungtu Sunil Chhetri chu enliam harsa a ni. 

ATK tan midfielder Javier Hernandez chu game siamtu a ni a, match 18-a goal 14 leh assist panga neitu Roy Krishna leh right back Prabir Das te ṭangkaina sawi hmaih chi a ni lo bawk. 

Kolkata club hian ISL squad-ah Ricky Lallawmawma chu Mizo an ziah lan awmchhun a ni a, Bengaluru hian Mizo player zingah Sairuatkima bak kawl an nei lo.