Champion lai BCA an lian

Mizoram Super League champion lai Zatkawt BCA chuan kai thar Ramhlun Sporting Club chu 98-65 in an sawp, nizan khan BCA hi an inlan chhunzawm leh nghal a, he thu buatsaih lai hian result kan hre hman lo.

Ningani zan Hawl Indoor Stadium, Republic Vengthlanga inkhelah BCA chu hun pawimawh laiah an chungnung. Team pahnih hi a tir lamah an inkhel tawk, 3rd quarter bikah phei chuan RSC an chungnung hial. 

Mahse quarter hnuhnung berah Lalrina Renthlei leh Zonunsanga ten RSC an chaih, Tuikhuahtlang tlangvalin point 22 a neih bakah rebounds vawi 12 lain MSL6 a match hmasa berah double-double a nei. Zonuna’n hun pawimawh laia 3-points a zawna a lut thei chu danglamna siamtu lian tak a ni bawk.

BCA an thiam a, state pawn player an lak luh zingah Sahaj R.Patel chauh la chhawr mah se hnehna chan nan a tawk. Gujarat tlangval hian mawi takin a ‘dunk’ thei a, tualchhung basketball ngaina tute tana hmuhnawm tur zinga mi a ni.

Zanin hian inkhel pakhat a awm dawn, match hmasa bera chak lo Chawnpui leh MSL season hmasa pahniha a champion thei Khatla TBL an inhmachhawn ang. Chawnpui tan semifinal beisei turin chak a pawimawh ang.