Golden State Warriors an vannei

Minute li leh second 30 chauh khelh hmabak an la neih laiin point riat ngawtin Golden State Warriors an hniam zawk a, hun a tawp meuh chuan NBA champion hian Portland Trail Blazers lakah 114-111 in hnehna an chang - NBA Western Conference Finals series-ah 2-0 in hma an hruai.

Nimin zing Oracle Arena, Oakland-a inkhelah Warriors lam hian hun tawp hma deuhin mawi tak takin ball an inpe kual a, tihsual an neih mang loh bakah lay up mawi leh dunk ropui hmangin team ṭha an nihzia an lantir. NBA Finals khel turin Steve Kerr-a naute tan match hnih chiah chak a ngai ta.

Game 2 bika point 37 ngawt neitu Stephen Curry chuan, "Ka nau Seth Curry nen kan intawn tawhna zingah chuan a ropui ber a ni hial ang, kan chhungkaw lam pawhin tun series hi chu hun rei tak chhung kan sawi dawn a ni. Ani a khel ṭha a, mahse keini lamin hnehna kan chang," tiin a nau Blazers tana point 16 hlawh chhuaktu nena an intawn chungchang a sawi.

NBA Most Valuable Player vawi hnih ni tawh Curry hian tun hnaia a match hnuhnung pathumah point 30 a nei tling ziah a, an team innghahna zinga pakhat Kevin Durant chu hliam vangin inlan thei lo mah se Curry leh a ṭhian pahnih Klay Thompson leh Draymond Green ten team an uap lum hneh hle.

Eastern Conference Finals lamah Milwaukee Bucks leh Toronto Raptors ten tukin dar 6:00 hian game 2 an khel ve leh thung dawn. NBA regular season bika hnehna chang hnem ber Bucks hian game 1-ah 108-100 a hnehna changin series 1-0 in hma an hruai mek a ni.