Kane-a telna England team

UEFA Nations League semifinal-a Netherlands nena inkhel tur England chuan squad an puang a, hliam vanga chawl mek captain Harry Kane a tel laiin Ruben Loftus-Cheek chu koh zingah a tel lo. 

Kum 23 mi Ruben Loftus-Cheek hi Chelsea tan friendly match a khelhna lamah a inhliam a, Europa League final-a Arsenal nen London derby an khelh turah pawh a inlan thei lo ang. Kane hi April 9 zana Manchester City nen Champions League quarterfinal first leg an khelh ṭumin a inhliam a, hemi hnu hian khelmualah a inlan leh tawh lo. 

England boss Gareth Southgate chuan, "Kane hi Champions League final khelh hman tumin a inbuatsaih mek a, a khel thei ta lo a nih pawhin kan tan buaina tur a ni lo. Kan zinga a tel ve ngei hi kan vai inlungrualna a ni," a ti a, a ṭul chen chen Kane chu an ngaihchan tur thu a sawi. 

Three Lions squad-ah hian player 27 an telh phawt a, June 6-a Netherlands nena Nations League semifinal khel turin player 23-ah May 27 hma hian an tihniam leh ang. England squad-ah hian Champions League final khel tur Tottenham Hotspur aṭangin player paruk koh an ni a, Liverpool-in player pathum an thawh bawk. 

Gareth Southgate chuan, "Hma hun thlir chuan England tan chuan thil duhawm tak a ni. Tuna ka player-ten tawnhriat an neih tam tak ang hi a hma zawnga kan neih loh kha a ni," tiin Spurs leh Liverpool thlen chin chuan a player-te a puih nasat thu a sawi. 
Manchester United left back Luke Shaw chu koh zingah a tel lo a, a aiah hian Foxes defender Ben Chilwell leh Tottenham defender Danny Rose te koh an ni. 

Southgate chuan, "Thutlukna harsa a ni lo. Chilwell leh Rose hian tun hnaiah an khel ṭha ṭhin em em a ni," tiin Shaw thlan loh chu thil harsa a nih loh thu a sawi. England hian Nations League semifinal-ah Netherlands hi an hneh a nih chuan final-ah Portugal leh Switzerland inkhela chak zawk an hmachhawn ang.