AIFF-in I League club a hrem

Ningania All India Football Federation disciplinary committee ṭhukhawm chuan March-April thlaa neih zawh tak Super Cup khel duh lo Aizawl FC, Gokulam Kerala FC, Neroca FC, Churchill Brothers leh Minerva Punjab FC te chu nuai 10 ṭheuh chawi turin a ti. 

AIFF hian East Bengal erawh club sponsor-tu vanga khel lo an nih avangin nuai nga chawi turin a ti thung. Inelna hmachhawn tura player pawh ziaklut lo Mohun Bagan chungah hremna lekkawh rih loin thuneitu sang zawk kutah an dah.

Hemi chungchangah hian Vanglaini chuan Aizawl FC thuneitute be pawp nghalin club neitu Robert Romawia Royte chuan, "AIFF hian a hnuaia club-te hi min ngaihtuah tawk lo a, kan hmalam hun tihchian duh vanga khel lo kan nih laia hetia hrem min tum ta mai hi hriatthiam a har hle. Club dang kan inrawn kual ang a, min hremna hi kan khinglet ang," tiin a sawi.

Super Cup-ah hian I League aṭangin Chennai City FC, Indian Arrows leh Real Kashmir te chauh an inlan a ni.