Allegri a chhuak dawn

Nimin tlai khan Juventus chuan an manager Massimiliano Allegri chungchangah thuchhuah an siam a, season tharah chuan Allegri hi an manager a ni chhunzawm dawn lo.

Italian club Juve chuan, "Massimiliano Allegri hi season tharah kan coach a nih chhunzawm dawn lo, coach leh club president Andrea Agnelli ten Inrinni (vawiin) hian media an hmachhawn ang," an ti. Tun season chhunga Allianz Stadium bika an match hnuhnung ber atan Pathianni zan dar 12:00-ah Atalanta an mikhual dawn a ni.

Kum 51 mi Allegri hian 2014 aṭang khan Juventus hi a enkawl ṭan, season nga chhung chu Serie A nomawi a chawi pui vek - kuminah pawh match khelh hmabak pali nei chungin an nomawi an humhim. Mahse, Turin club hian an duh ber Champions League nomawi an chawi thei lo. Real Madrid aṭanga Cristiano Ronaldo an lakluh hnuah pawh UCL-ah an hlawhtlin theih loh avangin fans lam aṭangin manager demna thu hriat tur a awm fo.

Juve thuneitu leh Allegri hi tun hnaiah an inbe ngun a, mahse club kalpui zal dan tura an ruahmannaah an thu a inhmu thei lo. Kum 2020 June thla tawp thleng a contract neih lai chu season khatin an titawp hma ta tihna a ni.