Vawiinah Mizoram vs Pondicherry Kan tan final ang a ni - Mizoram manager

India ram pum huap hmeichhe cricket inelna neih lai Womens Senior One Day Trophy-ah, vawiin chawhma dar 9:00 hian Mizoram leh Pondicherry an in hmachhawn dawn - knock out round lut tur zawnna match pawimawh a ni dawn.

Plate Group-ah Mizoram, Manipur, J&K, Arunachal Pradesh, Bihar, Puducherry leh Sikkim te nen an awm khawm a, an inkhelh kual vek hnuah a sang ber hi tlang tur an ni ang. Vawiina intawng turte hi a zawna vawi li chak tawh, tlawm la nei lo ve ve an ni.

Mizoram hian Manipur, J&K, Arunachal Pradesh leh Sikkim te an hneh tawh, Puducherry hnuah hian vawi hnih tlawm tawh Bihar an hmachhawn leh dawn. Tlang tur chuan Mizoram tan Puducherry hneh ngei a ngai tihna a ni.

Mizoram manager Raj Kumar Joshi chuan, "Inkhel zawng zawng a pawimawh vek, chutih rualin vawiina kan inkhel tur hi chu a pawimawh zual bik. Kan tan chuan final ang maia pawimawh a ni, fimkhur takin theihtawp kan chhuah ang.

"Min thlawptu tam tak a awm tih ka hria, min ṭawngṭai pui zel turin ka sawm. Tualchhung nula ten nasa takin hma an sawn a, an hmasawnna hi a takin a lang, inrintawkna an neih bawk avangin beisei pawh kan nei sang," tiin Vanglaini a hrilh.

Mizoram tan hian Julie Malsawmtluangi, PC Vansangzuali leh K. Lalrinawmi ten sulhnu ṭha an hnutchhiah mek zel. Zuali hian Manipur an hneh ṭumin run 84 zet a siam a, run a siam hnem bakah over sarih a vawm aṭanga run 22 chauh pe chungin wicket hnih a la; vawiinah pawh a pawimawh leh ang.