Indonesia an inhnukdawk

All England Open khelh laiah harsatna a thleng a, team ṭha Indonesia chu Covid-19 inkaihhruaina dan zawm harsa an tih avangin an inhnukdawk - Asian team hian tournament an hmachhawn dawn lo.

Inelna hi Nilaini khan khelh ṭan tur a ni, mahse coronavirus kaihhawih vangin a hun hi an sawn tlai hret. Indonesia team hi England an thlen hnuah inkhunghrang tura tih an ni a, player leh team thuneitu lamin an tan a chawpchilh em avangin a theih loh thu an sawi.

Badminton World Federation (BWF) chuan thuchhuah siamin, "Indonesia player zinga pakhatin hri leng a kai a, hei vang hian thlawhtheihnaa a chuanpui player dang pawh Britain thuneitu lamin ni 10 inkhunghrang turin an ti, hei vang hian an inhnukdawk.

"Hri vei nia ngaih hi endik nawn a ni a, mahse a fihlim leh tawh. Amaherawhchu player dang zawng zawng pawh an inlan dawn ta lo," tiin Indonesia team thutlukna an puang.

India player-te pawhin harsatna an tawk, player pathum chu hri kai nia puan an ni. An dinhmun endik nawn a ni a, buaina nei zingah hian world number 1 hlui Saina Nehwal pawh a tel; Saina hian tun hma pawhin Covid-19 vangin buaina a lo nei tawh.

All England Championship-ah hian China, Taiwan leh South Korea te chuan team an kal tir lo; Indonesia an inhnukdawk leh a, Olympic champion Carolina Marin a inlan loh bawk avangin kum danga a hlutna ang chu a phak dawn lo.