Mikel Arteta a hlauthawng

Arsenal manager Mikel Arteta chuan FIFA lamin international match a kalpui dan chu ṭha lo a ti a, player zin chhuak ten hri leng chungchangah harsatna an thawh nasat a hlauhthawn thu a sawi chhuak.

Gunners hian Inrinni zanah Premier League khel turin West Ham an tlawh dawn, chumi hnuah chuan an player tam tak chu ram tana fehchhuah a ngai dawn a ni - World Cup qualifier khelh tur a ni dawn.

Ram hrang hrangin match khelh tur an ngah, chung zingah chuan England hmabak pawh a hautak - ni ruk chhungin World Cup qualifier match thum an khelh a ngai dawn, hri leng bakah player tan hliam neih a hlauhawm dawn tih a chiang.

Arteta chuan, "Tuna kan kalphung hi chu a dik ka ti lo, chutih rualin kan duh loh vanga inthlak leh danglam ngawt tur erawh a ni lo tih a chiang, an ruahman dan angin an kaltlang dawn tho tih ka hria.

"Ram hrang hranga an football hruaitute nen kan inbe reng a, an kalphung leh player enkawl dan ka ringtawk. Player ten an phurh zawh tawk mawhphurhna an koah an hlan thiam ngei pawh ka beisei," a ti.

Arsenal hian hliam vangin Bukayo Saka an chhawr thei lo mek. England international hi kar leha San Marino, Albania leh Poland an hmachhawn hunah ram tan a inlan thei dawn em, tih a la chiang lo.

Britain chuan ram ṭhenkhat chu 'Red List'-ah a dah, heng hri leng hlauhzawm zualna hmun aṭanga Britain kalte chu inkhunghran a ngai zel. Hei vang hian Arsenal chuan heng ram bika zin chhuak tur an player an awm a nih chuan zin lo thei zawk se an duh a ni.

Arsenal player zingah hian Pierre-Emerick Aubameyang leh Thomas Partey te chu match nei tlem tur an ni. Gabon leh Ghana ten kar khat chhung hian match khat bak khelh tur an nei lo.